Т.САЙХАН

Хууль зүйн байнгын хорооны өнөөдрийн /11.05/ хуралдаанаар Үндсэн хуулийн Цэцийн 2025 оны 08 дугаар дүгнэлтийн тухай, УИХ-ын дэд дарга Х.Булгантуяад хариуцлага тооцох асуудлыг хэлэлцлээ. Энэ асуудалтай холбогдуулж байнгын хорооны гишүүд дараах байр суурь илэрхийллээ.

УИХ-ын гишүүн П.Сайнзориг: -Нэгдүгээрт, Х.Булгантуяа дарга Дэгийн хуулийг барьж ажиллана. Дэгийн хуультай холбоотой Үндсэн хуулийн Цэц дээр ямар ч маргаан байгаагүй.  Маргаан байгаагүй энэ хуулийг удирдлага болгож хуулийг даргалсныхаа төлөө Үндсэн хуулийг зөрчсөн гэдэг бол энэ парламентын цаашдын дархлаанд маш ноцтой үр дагавар. Тэгэхээр бид Дэгийн хууль Үндсэн хуульд нийцэж байгаа эсэхийг дүгнүүлэх ёстой байсан юм. Дараа нь Х.Булгантуяа дэд даргын асуудлыг ярих ёстой байсан.Дэгийн хууль нь өнөөдөр хүчин төгөлдөр буюу Үндсэн хууль зөрчсөн ямар нэг шийдвэр гараагүй байхад Х.Булгантуяа дарга дээр алгасаад энэ асуудлыг шийдэж байгаа нь хардалт төрүүлж байна.Хэн дээр ч ирж болно. Чуулган даргалсан хүнийг ингэж хэлмэгдүүлж болохгүй. Ийм зүйл рүү явлаа. Үндсэн хуулийн Цэцийн эцэслэн шийдэж байгаа шийдвэр хүчингүй болгосугай гэж гардаг. Энд хүчингүй болгох тухай яриагүй шүү.

УИХ-ын гишүүн Д.Ганбат: -Бид нар Үндсэн хуулийн Цэцийн дүгнэлтийг хэлэлцэж болохгүй шүү. Зөв томъёолоорой. Энэ дүгнэлтийг долоо хоногийн дотор шийдэх ёстой байсан. Үндсэн хуулийг зөрчсөн УИХ-ын гишүүн Х.Булгантуяа гээд байх хэрэгтэй юм уу. Шөнөжингөө алх бариад нүдээд байсан ш дээ. Би эхний өдөр буюу аравдугаар сарын 16-ний өдөр Үндсэн хууль зөрчих гээд байгаа юм байна гэж ойлгоод чуулганд суугаагүй. Ирц нь ч бүрдээгүй. Аравдугаар сарын 17-нд өглөө би хуралдаа ирсэн. Үндсэн хууль зөрчиж болохгүй шүү гээд анхааруулаад байсан, ийм ялтай шүү гэдгийг ч анхааруулсан. Өөрөө ч ярьж л байна лээ. Хэн нэгэн Х.Булгантуяадаа биш ээ, энэ асуудал чинь. Хулгай луйвар чинь гаараад Үндсэн хууль үйлчлэхээ байгаад бусад хууль үйлчлэхээ болиод энэний чинь гор гарч байгаа ш дээ.Баахан нүүрсний хулгайч нар чинь толгой дээр гараад суучихсан. Тэд нарын хань хамсаатан дэмждэг хүмүүс нь нэг талдаа гарчихсан. Арван жил эрх барьсан Ардын намын ялзрал ингэж гарч байгаа. Нүүрсний хулгайч нарын нэг хэсэг болчихоороо толгой дээр гараад яаж ч болно гээд бодчихсон. 

Эх сурвалж:www.polit.mn