Т.САЙХАН
 

Засгийн газрын ээлжит хуралдаанаар Эрдэнэс Тавантолгой компанийн 581 гэрээг олон нийтэд ил болгох, сүүлийн гурван жилийн тайланд олон улсад хүлээн зөвшөөрөгдсөн компаниар аудит хийлгэх шийдвэр гаргасан байна. Мөн  ЭМДС-ийн шалгалтаар гарсан дүгнэлтийг танилцуулав.

ЗГХЭГ-ын дарга С.Бямбацогт: Засгийн газрын өнөөдрийн хуралдаанаар Эрдэнэс Тавантолгой компанийн 2010 оноос хойш өнөөдрийг хүртэлх хугацаанд хийсэн нүүрс худалдах, худалдан авах 581 гэрээг олон нийтэд ил болгох шийдвэр гаргалаа. Өнгөрсөн хугацаанд хийгдсэн 586 гэрээ байна. Үлдсэн таван гэрээ нь олон улсын томоохон компаниудтай хийсэн, нөгөө талаас зөвшөөрөл авч байж, ил болгох ёстой гэрээнүүд юм.

Засгийн газрын хурлаар сарын өмнө тус компанийн оффтейк 40 гэрээг ил болгох шийдвэр гарч байсан. Эдгээр гэрээг ЭТТ-н вэбсайтад байршуулах ажлыг хийнэ.

Ерөнхий сайдаас өгсөн үүргийн дагуу Тавантолгой компанийг нээлттэй хувьцаат компани болгох шийдвэр гаргасан. Үүний эхний алхам болгож Эрдэнэс Тавантолгой компанийн сүүлийн гурван жилийн тайланд олон улсад хүлээн зөвшөөрөгдсөн компаниар аудит хийлгэнэ. Тухайн компанийг нээлттэй сонгон шалгаруулалт сонгоно. Энэ ташрамд, өнгөрсөн 15 жилийн хугацаанд Эрдэнэс Тавантолгой компани 176 сая тонн нүүрс олборлож, 166 сая тонн нүүрс борлуулсан байна. Үүний үр дүнд 37 их наядын орлого олж, улсын төсөвт 10.8  их наяд төгрөгийн татвар хураамж төлсөн. Мөн компанийн хувьцаа эзэмшигчдээс 2.2 их наяд төгрөгийн ногдол ашгийг хувьцаа эзэмшигчдээ олгосон байна.

Эх сурвалж:www.polit.mn