А.Эрхэмбилэг

Хүйтний улирал ирсэн энэ үед ноолууран гутал, хувцасны хэрэглээ эрс нэмэгджээ. Гэвч ихэнх хэрэглэгч ноолууран эдлэлээ зөв арчлах мэдлэг дутмаг байдгаас болж эдлэлийн насжилт богиносож, өнгө зүс, хэлбэрээ хурдан алдах тохиолдол элбэг. Иймд мэргэжилтнүүдийн зөвлөсөн зөв арчилгааны нууцыг хүргэж байна.

Мэргэжилтнүүдийн хэлснээр ноолуур нь хамгийн дулаан, зөөлөн, хөнгөн материалуудын нэг боловч арчилгааны хувьд нарийн анхаарал шаарддаг. Ноолууран хувцсыг 30 хэмээс хэтрэхгүй бүлээн усаар, гараар зөөлөн угаах нь хамгийн тохиромжтой. Машинд угаах тохиолдолд “wool” буюу “ноос ноолууран” горимыг сонгох хэрэгтэй бөгөөд хүчтэй угаалгын нунтаг хэрэглэхээс зайлсхийх хэрэгтэй.

“Ноолууран эдлэлийг хатаагчид хийж болохгүй. Алчуураар чийгийг нь шингээж, сүүдэрт хэвтээ байдлаар хатаах ёстой. Ингэснээр эдлэл хэлбэрээ хадгална. Мөн ноолууран эдлэлээ жилдээ дор хаяж нэг удаа мэргэжлийн аргаар цэвэрлүүлэх, хадгалахдаа битүү уутанд бус амьсгалдаг даавуун уутанд хийх, хэт шахахгүй байх нь хамгийн зөв арчилгаанд тооцогддог” хэмээн cashmere care зөвлөхүүд онцоллоо.

Сүүлийн жилүүдэд ноолууран гутал ч залуусын дунд түгээмэл болжээ. Гэвч уг гутал нь ус чийг, тоос шороонд амархан өртдөг тул ус нэвтрүүлэхгүй хамгаалалтын шүршигч хэрэглэх, өмсөөгүй үед хэлбэр хадгалагч хийж, агаар нэвтрэх уутанд хадгалах нь зүйтэй. Мэргэжилтнүүдийн үзэж буйгаар, зөв арчилгаа нь ноолууран эдлэлийн эдэлгээг 3-5 жилээр уртасгаж, гадаад үзэмжийг шинэ мэт хадгалах боломжтой байдаг.

Эх сурвалж:www.polit.mn