Т.САЙХАН

МАН-ын бүлгийн  хуралдаанаар хэлэлцсэн асуудал, гаргасан шийдвэрийн талаар мэдээлэл өглөө. Аж үйлдвэр, эрдэс баялгийн сайд Г.Дамдинням "Манай улс сүүлийн 30 гаруй жилийн хугацаанд шатахууны нөөц бүрдүүлэх, хадгалах, тээвэрлэх ажлуудад хангалттай анхаарал хандуулж ирээгүй нь өнөөгийн нөхцөл байдалд тодорхой хэмжээгээр нөлөөлж байна. Иймд бид ОХУ-тай яаран гэрээ хэлэлцээр хийхээс илүүтэйгээр, урт хугацаанд энэ асуудал бидэнд хэрхэн нөлөөлөхийг бодож, тогтвортой шийдэл гаргах нь чухал юм.

Шатахууны хомсдолтой холбоотойгоор иргэдэд хүргэх хамгийн чухал мэдээлэл бол нөхцөл байдал аажмаар сайжирч байгаа явдал юм. Уржигдараас өчигдөрт, өчигдрөөс өнөөдөрт байдал улам дээрдэж байна. Ирэх долоо хоногийн лхагва гарагаас эхлэн шатахууны нийлүүлэлт хэвийн болно гэж үзэж байна.

ОХУ болон Монгол Улсын Засгийн газар хооронд байгуулсан хэлэлцээрийн хүрээнд шатахууны нийлүүлэлт хангалттай хэмжээнд үргэлжилж байгаа. Харин баруун таван аймагт одоогоор Улаанбаатар хотоос шатахуун тээвэрлэн нийлүүлж байна. Эдгээр аймгууд руу ОХУ-аас шууд шатахуун нийлүүлэх талаар хэлэлцээр хийж байгаа бөгөөд ирэх арваннэгдүгээр сараас эхэлж магадгүй гэсэн мэдээлэл байна. Тэр хугацаа хүртэл төвийн бүсээс шатахуун нийлүүлэлтийг үргэлжлүүлнэ" гэлээ. 

Эх сурвалж:www.polit.mn