Т.САЙХАН

УИХ-ын нэгдсэн чуулганы хуралдаан эхэллээ.  УИХ-ын дэд дарга Б.Пүрэвдорж даргалж байгаа бөгөөд энэ талаар УИХ-ын ерөнхий нарийн бичгийн дарга Б.Баасандорж "УИХ-ын дараагийн даргыг сонгох хүртэл УИХ-ын дэд дарга Х.Булгантуяа УИХ-ын тогтоолд заасны дагуу УИХ-ын даргын бүхэн эрхийг хэрэгжүүлж байгаа. Өчигдөр УИХ-ын даргын үүргийг гүйцэтгэж байгаа УИХ-ын дэд дарга Х.Булгантуяа болон УИХ-ын дэд дарга Б.Пүрэвдорж нар холбогдсон байсан. УИХ-ын тухай хуулийн 14.4 дүгээр зүйл дээр УИХ-ын дэд даргыг сонгох, чөлөөлөх, бүрэн эрхийг хэрэгжүүлэх талаар зааж өгсөн байдаг. Үүний дагуу УИХ-ын дэд дарга Б.Пүрэвдорж УИХ-ын чуулганыг даргалах бүрэн боломжтой" гэв. 

УИХ-ын дэд дарга Б.Пүрэвдорж:-УИХ-ын нэгдсэн чуулганы өнөөдрийн нэгдсэн хуралдаанаар нийт таван асуудлыг хэлэлцэнэ. Ингэхдээ үдээс өмнөх хуралдаанаар дараах хоёр асуудлыг хэлэлцэнэ.  Харин  үдээс хойших хуралдаанаар Засгийн газрын гишүүнийг танилцуулах тухай асуудлыг хэлэлцэх саналтай байна. Үүнтэй холбоотойгоор УИХ-ын ерөнхий нарийн бичгийн дарга Б.Баасандорж та хэдэн асуултад хариулна уу. Нэгдүгээрт Засгийн газрын гишүүнийг танилцуулах тухай асуудал өмнө нь хэчнээн удаа хэлэлцэх асуудлын товд орж байсан бэ?

УИХ-ын ерөнхий нарийн бичгийн дарга Б.Баасандорж:

-Монгол Улсын Ерөнхий сайдаас ирүүлсэн Засгийн газрын гишүүнийг огцруулах, томилох тухай асуудал өмнөх чуулганы хоёр удаагийн тов дараалалд орж байсан. Тухайлбал өнгөрсөн Баасан гаригийн хуралдааны тов дараалалд байсан. 

УИХ-ын дэд дарга Б.Пүрэвдорж: -Тэгэхээр энэ асуудал өмнө нь УИХ-ын даргын дэргэдэх зөвлөлийн хурлаар дэмжигдэж, хэлэлцэгдэх гэж байсан гэсэн үг үү? 

УИХ-ын ерөнхий нарийн бичгийн дарга Б.Баасандорж: -Тийм

УИХ-ын дэд дарга Б.Пүрэвдорж: 

-Хэлэлцэх асуудал тодорхойгүй шалтгаанаар хойшилсон учраас өнөөдрийн хэлэлцэх асуудлын зургадугаарт оруулж байна. Үүнтэй холбоотойгоор хэлэлцэх эсэхийг дэмжих санал хураалт явуулъя гээд санал хураалт явуулахад гишүүдийн 53.7 хувийн саналаар санал дэмжигдлээ. 

Эх сурвалж:www.polit.mn