Т.САЙХАН
УИХ-ын гишүүн Н.Наранбаатар тэргүүтэй 38 гишүүн бүлгийн дарга Ж.Бат-Эрдэнэд шаардлага хүргүүлсэн байна. Шаардлагад бүлгийн хуралдааныг өнөөдөр 16:00 цагт эхлүүлэхгүй бол МАН-ын бүлэг нь дөрвөн дэд даргатай бөгөөд тэднээс нэг нь тус хуралдааныг удирдана гэлээ. Бүлгийн хуралдааныг зарлан хуралдуулах шаардлага тулгарсан үндэслэлээ УИХ-ын гишүүн Н.Наранбаатар “Бүлгийн хурлыг намын дарга, бүлгийн гишүүдийн олонхи шаардсан бол хуралдуулах боломжтой. Бүлгийн гишүүдийн олонхи буюу 38 гишүүн шаардлага тавилаа. Бүлэг сүүлийн хоёр долоо хоног хуралдсангүй. Улс орны өмнө тулгамдсан олон асуудал хуримтлагдлаа. Бүлэг хуралдаж улс төрийн шийдвэрээ гаргах зайлшгүй шаардлага үүссэн. Аравдугаар арын 9-нд бид цөөхүүлээ бүлгийн даргад бүлгийн хурлыг зарлах шаардлага тавьсан. Мөн гишүүд бүлгийнхээ групп дээр бүлгээ хуралдуулж, улс орны өминө тулгамдсан асуудлаа хэлэлцье гэтэл хурал зарлаагүй, хүлээлгээд байгаа. Цаг хугацаа бага байна, баруун аймгууд гантай байсан. Зуд болох эрсдэл өндөр байна. Төсөв хэлэлцэх шаардлага байна. Засгийн газрыг огцруулах шаардлага, УИХ-ын даргыг огцруулах шаардлага өргөн барьсан байгаа тул хэлэлцэх асуудал их байна. Төрийн ажил тасралтгүй явж байх ёстой тул байнгын хорооны хурлыг өнөөдөр 16:00 цагт дуусангуут үргэлжлүүлээд бүлгийг хуралдах боломжтой. УИХ дахь МАН-ын бүлгийн даргын хувьд МАН-ын Удирдах зөвлөлийн хурлыг хуралдуулах шаардлага байгаа тухай хэлсэн. УИХ-ын үйл ажиллагаа намаас ангид үйл ажиллагаа явуулах ёстой. Ерөнхий сайдыг огцруулах асуудлыг МАН ын Бага хурлаар шийдвэрлэдэг, Удирдах зөвлөлөөр шийпдвэрлэдэггүй. Тиймээс МАН-ын Удирдах зөвлөлөөр Ерөнхий сайдыг огцруулах асуудлыг ярих шаардлагагүй, бүлэг дээрээ ярилцаж шийдвэрээ гаргах ёстой” гэлээ.
Харин УИХ дахь МАН-ын бүлгийн дарга Ж.Бат-Эрдэнэ “Бүлгийн хуралдааныг маргааш /2025.10.15/ 12:00 цагт зарласан. Эвлэрэх ажлыг өнөөдрийг хүртэл хийгээд явж байна. Ерөнхийлөгчтэй зөвшилцсөн. Цаашаа ийм байдлаар явбал төрийн ажил зогсох гээд байна. Хоёр тал огцруулах бичгээ татаж аваасай гэдэг санал хүргүүлээд явж байна. Хамгийн том нам нь улс төрийн тогтворгүй байдал руу орсон тул Ерөнхийлөгчтэй мэдээлэл солилцолгүй яах вэ дээ. УИХ-ын дарга, Ерөнхий сайд учраа олоогүй байхад бүлгийн хурал зарлавал хэрүүл л болно. Тийм учраас бүлгийн хуралдааныг хэрүүл болгохгүйн тулд маргааш 12:00 цагт зарлаад байна” гэв.
Эх сурвалж:www.polit.mn