П.АМГАЛАН

Ерөнхий сайд Г.Занданшатарыг огцруулах саналыг Төрийн байгуулалтын байнгын хороогоор хэлэлцэж дууслаа.  Хэлэлцэж буй асуудалтай холбогдуулан УИХ-ын 10 гишүүн асуулт асууж хариулт авч байна.

УИХ-ын гишүүн Х.Болормаа:-Юуны өмнө, Үндсэн хуулийн нэгдүгээр зүйлээс ишилж хэлье гэж бодож байна. Ардчилсан ёс, шударга ёс, эрх чөлөө тэгш байдал, Үндэсний эв нэгдлийг хангах хууль дээдлэх нь төрийн үйл ажиллагааны үндсэн зарчим мөн гэж тусгасан байна. Сүүлийн 100 хоног энэ байдал тэр чигээрээ уланд гишгэгдэж байна. Уг нь дөрөв сар орчмын өмнө Ерөнхий сайдыг, энэ Засгийн газрыг дуу нэгтэйгээр томилсон. Бүгд, итгэж дэмжсэн. Гэвч өнгөрсөн 100 хоногийн ажлын хангалтгүй байдал, цаашлаад өнгөрсөн арван хоног бол бараг галзуурлын түвшинд очлоо. Та ард түмэндээ хандаж мэдэгдэл хийхдээ “Хууль зүйн сайдыг онцгойлон нэг хүнийг яллахын тулд томилж байгаа” гэдгийг ил тод хэлсэн. Ерөнхий сайд мэдээж бүрэн эрхийнхээ хүрээнд хэнийг ч сайдаар томилж болно. Гэхдээ ийм зорилгоор хэзээ ч болохгүй. Олон асуудал ярьж байгаа болохоор оффтэйк, АМНАТ гээд эндээс анхаарал саараад байна. Гэхдээ эрх зүйт Монгол Улсад аливаа нэг хүнийг яллах зорилгоор хонгилын түлхүүрийг гардуулж өгч болохгүй. Энэ ил болсон зүйл. Сүүлийн хэдэн хоног ордонд далд болж байгаа зүйлийг бүгдээрээ ярилцъя. Засгийн газар, УИХ-ын гишүүдийг нэг нэгээр нь дарамталж, сүрдүүлж байна. Компаниудад нь шалгалт оруулж байна, зөвшөөрлийг нь цуцална гэж байна. Сандал, суудлаа авч үлдэхийн тулд заримд нь хүссэн бүрийг нь амлаж байна. Өнөөдөр УИХ-ын чуулганд хэдэн гишүүн ирэхгүй байгааг харах хэрэгтэй. Хэн хэнийг дарамталж, сүрдүүлсэн байна. Эсвэл хэн хэнтэй эрх ашгаар нэгдсэн байна гэдгийг анзаарах ёстой. Парламент Засгийн газрыг томилдог шүү. Төрийн бүх эрх мэдэл ард түмэнд байдаг шүү гэдгийг та нар хэтэрхий мартаж байна. Энэ гажуудлыг арилгахын тулд Засгийн газар огцрох ёстой гэж үзэж байгаа” гэлээ.

Эх сурвалж:www.polit.mn