П.АМГАЛАН
Ерөнхий сайд Г.Занданшатарыг огцруулах саналыг Төрийн байгуулалтын байнгын хороогоор хэлэлцэж эхэллээ. Хэлэлцэж буй асуудалтай холбогдуулан УИХ-ын 10 гишүүн асуулт асууж хариулт авч байна.  
УИХ-ын гишүүн Б.Баярбаатар:-Ерөнхий сайдаас асуух хэд хэдэн асуулт байна. Та хэдээс хэдэн оны хооронд Хэрэг эрхлэх газрын даргаар ажиллаж байсан бэ. УИХ-ын дарга болон Үндэсний аюулгүй байдлын зөвлөлийн гишүүн байсан бэ. 
Та Үндэсний аюулгүй байдлын зөвлөлийн хуралдаа суудаггүй байсан юм уу.  Энэ хэдэн оффтэйк  гэрээ чинь ил болсон юм шиг байна. “Бодь” групп гээд тухайлсан  хүмүүсийн нэр зурагтайгаа гараад байна.  Анх төмөр замыг байгуулах шийдвэр хаана гарсан юм бэ. Хэн гаргасан юм бэ. Төмөр замыг барих мөнгийг хаанаас олохоор ярьсан юм бэ. Хэнээр гүйцэтгүүлье гэж ярьсан юм. Хэн шийдсэн юм бэ. Энэ шийдвэрийг яагаад нууцалсан юм бэ. Энэ шийдвэрийг нууцаас гаргахыг шаардаж байна. Нууцад оруулъя гэсэн шийдвэрийг хэн гаргасан юм бэ. Үүнийг Л.Оюун-Эрдэнэ даргаас асууя. Та таван жил ерөнхий сайдаар ажилласан хүн” гэв.
Ерөнхий сайд Г.Занданшатар:-Б.Баярбаатар гишүүн төрийн түшээ хүн хуулиа сайн судлах хэрэгтэй. Үндэсний аюулгүй байдлын зөвлөл оффтэйк гэрээ юм уу, гүйцэтгэх засаглалын шийдвэр гаргадаг субъект биш. Зөвлөмж гаргадаг газар. Үндэсний аюулгүй байдлын зөвлөлөөс ямар ч оффтэйкийн гэрээ байгуулаагүй. Би оффтэйкийн гэрээ байгуулах нь битгий хэл харж, уншиж ч үзээгүй. Сая ил тод болохоор нь харж байна” гэлээ.
Эх сурвалж:www.polit.mn