Т.САЙХАН

Прокурорын байгууллагаас нүүрс олборлолт, экспорт, тээвэрлэлт, худалдан авах үйл ажиллагаатай холбоотой хэргүүдийг шалгах чиг үүрэг бүхий ажлын хэсгийг байгуулан ажиллаж байна. Уг ажлын хэсгээс нийт 124 хэрэгт мөрдөн шалгах ажиллагаа явуулж, 156 хүн, 3 хуулийн этгээдийг яллагдагчаар татсан байна. Тэдний дундаас 108 хүн, 3 хуулийн этгээдэд “эрх мэдэл, албан тушаалын байдлаа урвуулан ашигласан”, “хахууль авсан, өгсөн”, “үндэслэлгүй хөрөнгөжсөн”, “мөнгө угаасан” зэрэг гэмт хэрэгт холбогдуулан прокуророос яллах дүгнэлт үйлдэж, шүүхэд шилжүүлжээ.

Шүүх дээрх хэргүүдийг хянан хэлэлцээд 88 этгээдийг гэм буруутайд тооцон, эрүүгийн хариуцлага оногдуулсан байна.

Үүнээс,

• 5 хүнд хоёр жилээс 5 жил 9 сарын хугацаагаар хорих ял,
• 80 хүнд гурван саяас 38 сая төгрөгийн торгох ял,
• 63 хүнд 2-7  жилийн хугацаагаар нийтийн албанд ажиллах эрх хасах ял тус тус оноожээ.

Улмаар гэмт хэрэг үйлдэж олсон 353 сая төгрөгийн үнэлгээ бүхий хөдлөх, үл хөдлөх хөрөнгө, 14.9 тэрбум төгрөгийг шүүгдэгч нараас гаргуулж, улсын орлого болгохоор болсон байна. Мөн эдгээр хэргийг мөрдөн шалгах явцад нийт 2.2 тэрбум төгрөгийн шилжилт хөдөлгөөнийг хязгаарлаж, төрд учирсан 194.384 ам.доллар болон 23.8 тэрбум төгрөгийн хохирлыг нөхөн төлүүлжээ.

Шүүхэд шилжүүлсэн хэргүүдээс одоогоор 20 хүнд холбогдох хэрэг хянан хэлэлцэгдээгүй байгаа бөгөөд 40 хэрэгт мөрдөн шалгах ажиллагаа үргэлжилж байгаа талаар Улсын ерөнхий прокурорын газраас мэдээллээ.

Эх сурвалж:www.polit.mn