Т.САЙХАН

Засгийн газрын 55 дугаар тогтоол төсөвт 200 тэрбум төгрөгийн хохирол учруулсан гэх асуудлаар Аж үйлдвэр, эрдэс баялгийн сайд Г.Дамдинням мэдээлэл хийлээ.УИХ-ын гишүүн П.Сайнзориг Г.Занданшатарын Засгийн газрыг огцруулах үндэслэлийг Ашигт малтмалын нөөц ашигласны төлбөр тооцох аргачлалыг өөрчилж баталсан Засгийн газрын 55 дугаар тогтоолтой холбон тайлбарласан. Тэрээр Засгийн газар дур мэдэн АМНАТ тооцох аргачлалыг өөрчилж, улсын төсөвт орох ёстой байсан АМНАТ-ийн орлогыг 200 тэрбум төгрөгөөр бууруулсан нь Үндсэн хууль болон бусад хуулийг зөрчсөн гэж үзэж байгаа юм. Тэгвэл Засгийн газар өмнө нь яг ийм утга бүхийг тогтоолыг есөн удаа гаргасан бөгөөд Г.Занданшатарын баталсан 55 дугаар тогтоол 10 дахь удаагийн тогтоол аж. Өмнө нь гаргасан есөн тогтоолын 5-д нь П.Сайнзориг гишүүн албан тушаалаараа оролцож байсан талаар Аж үйлдвэр эрдэс баялгийн сайд Г.Дамдинням хэллээ.

Тэрээр “Засгийн газрын наймдугаар сард гаргасан тогтоол хууль зөрчөөгүй. Үүнтэй ижилхэн тогтоол өмнө нь есөн удаа гаргасан байдаг. Энэ 10 дахь удаагийн тогтоол. Биднийг ажил авахад нүүрсний экспорт зогссон, биржийн арилжаа зогссон, төсвийн орлого тасарсан, хасах эдийн засагтай болсон байсан. АМНАТ-ийн орлого тасарсан, төрийн албан хаагчдын цалин, ахмадын тэтгэврийг олгож чадахгүй болсон байсан. Тиймээс би Засгийн газрын гишүүний хувиар хоёр тогтоол оруулж батлуулсны үр дүнд өнөөдөр эдийн засаг нэмэх болсон. Үүний үр дүнд биржийн экспорт нэмэгдэж, АМНАТ-ийн орлого нэмэгдсэн. 55-р тогтоолтой яг ижил Ашигт малтмалын тухай хууль, Биржийн тухай хуулиудад заасан Засгийн газар бүрэн эрхийнхээ хүрээнд өмнө нь есөн удаа гаргаж байсан тогтоолуудтай яг ижилхэн тогтоолыг Засгийн газар гаргасан. Сонирхолтой нь өмнө гарсан тогтоолуудад янз бүрийн хувилбарууд байсан. 100 төгрөгийн үнэтэй зүйлийг 50 төгрөгөөр үнэлэх шийдвэр ч гаргаж байсан. Өөрөөр хэлбэл, татвараас зугтах боломжийг олгосон байдаг. 100 төгрөгийн үнэтэй зүйлийг 120, 150 төгрөгөөр үнэлж, илүү татвар авч, аж ахуйн нэгжүүдээ хүнд байдалд оруулсан шийдвэр ч гаргаж байсан юм билээ. Асуудал яриад байгаа гишүүн өөрөө 2013 оноос хойш Хууль зүйн яаманд ажиллах хугацаандаа уул уурхайн салбарыг хариуцсан мэргэжилтэн, Хууль зүйн бодлогын газрын дарга, Төрийн нарийн бичгийн даргаар есөн жил орчим ажиллахдаа энэ 10 тогтоолын тавд нь оролцож шийдвэр гаргалцсан байдаг. Энэ 5 тогтоолын зарим нь гэрээний үнээр хийх буюу татвараас зугтаах боломж олгосон тогтоолууд байна. Тэр үед яагаад Засгийн газрыг огцруулах асуудлыг ярьж байгаагүй юм бэ.

Г.Занданшатарын Засгийн газар үнэнийг хэлье, бодит байдлыг нээлттэй болгоё гэсэн зарчмыг барьж байгаа. Биржийн тухай хуультай болсноор бид дотооддоо ил тод үнэтэй болсон. Энэ хуулиа идэвхжүүлж, хамгаалах ёстой. Энэ хуулийг болиулахын төлөө байнга шахдаг.

П.Сайнзориг гишүүн үүнээс долоон дор шийдвэрүүдэд оролцож явсан хэрнээ үүнийг Засгийн газрыг огцруулах үндэслэл болгон оруулж ирж байгаа нь улс төрийн зорилготой. Түүнээс улс орноо бодож байгаа зүйл байхгүй.

Засгийн газар яаралтай арга хэмжээ авч байж, төслийн орлогоо нэмж чадсан. Засгийн газар энэ тогтоолыг наймдугаар сарын 25-нд гаргасан. Үүний үр дүнд 80.1 тэрбум төгрөгийн нэмэлт орлого олсон. Оны төгсгөл гэхэд 130 тэрбум төгрөгийн нэмэлт орлого олох тооцоолол хийсэн. Энэ тооцооллыг Уул уурхайн яам дангаараа хийдэггүй. Сангийн яам, Эдийн засаг хөгжлийн яам гэж бий" гэлээ.

Эх сурвалж:www.polit.mn