Т.САЙХАН

Дүүргийн Эрүү иргэний хялбар ажиллагааны анхан шатны тойргийн шүүх өчигдөр /08.26/ хуралдаж, яллагдагч Ц.Санжаачойпэлд авсан цагдан хорих таслан сэргийлэх арга хэмжээний хугацааг нэг сараар сунгаж шийдвэрлэжээ. Шүүхээс гаргасан шийдвэрийн дагуу тэрбээр маргааш суллагдах байсан юм. Үүнийг нь прокурор эсэргүүцэж гомдол гаргаад байв. 

Тодруулбал, тус тойргийн шүүх наймдугаар сарын 21-нд яллагдагч У.Санжаачойдэлд авсан цагдан хорих хугацааг сунгуулах тухай прокурорын хүсэлтийг хэлэлцсэн ч хүлээн аваагүй юм. Энэхүү шүүгчийн захирамжийг прокурор эс зөвшөөрч тус тойргийн шүүхийн Ерөнхий шүүгчид гомдол гаргасныг өчигдөр хянан хэлэлцээд шүүгчийн захирамж нь хууль ёсны үндэслэлтэй байх хуулийн шаардлагыг хангаагүй, өөрөөр хэлбэл урьд  цагдан хорих таслан сэргийлэх арга хэмжээ авсан үндэслэл арилаагүй байхад прокурорын саналыг хүлээн авахаас татгалзсан нь хууль зүйн үндэслэлгүй, хуульд нийцэхгүй байх тул прокурорын гаргасан гомдлыг хангаж, тус шүүхийн 2025 оны наймдугаар сарын 21-ний өдрийн 2025/ЦХШЗ/2550 дугаар шүүгчийн захирамжийг өөрчилж, яллагдагч Ц.Санжаачойпэлд авсан цагдан хорих таслан сэргийлэх арга хэмжээний хугацааг нэг сарын хугацаагаар сунгаж шийдвэрлэх нь зүйтэй гэж үзсэн байна.

Эрүү иргэний хялбар ажиллагааны анхан шатны тойргийн шүүхээс өнгөрсөн долдугаар сарын 23-нд Ц.Санжаапойпэл, Э.Тэмүүлэн, Л.Алтан-Очир нарыг 30 хоног цагдан хорих шийдвэр гаргасан. Харин Ц.Санжаапойпэлийн өмгөөлөгч гомдол гаргаснаар шүүхээс энэ сарын 8-нд түүнийг суллах шийдвэр гаргасан. Дээрх шийдвэрийг прокурор эсэргүүцэж гомдол гаргасныг Дүүргийн эрүү иргэний хэргийн хялбар ажиллагааны тойргийн шүүх наймдугаар сарын 15-нд хэлэлцээд хүлээн авснаар буцаан цагдан хориод байсан юм.

Сануулахад, “Эрэл” группын захирал Б.Эрдэнэбатын хүү Э.Тэмүүлэн, УИХ-ын гишүүн асан Ц.Цэрэнпунцагийн хүү Ц.Санжаапойпэл, Л.Алтан-Очир нарыг өнгөрсөн долдугаар сарын 19-нд “Канте” шөнийн цэнгээний газрын гадаа бусдыг зодож биед нь хүнд гэмтэл учруулсан хэрэгт холбогдсон гэж цагдаагийн байгууллагаас мэдээлж байв. Энэ хэрэгт холбогдоод байгаа “Таван богд” группын захирал Ц.Баатарсайханы хүү Б.Амарсайхан хилээр гарсан тул орж ирэнгүүт нь цагдан хорих шийдвэр хүчинтэй гэж мэдээлсэн юм.

Эх сурвалж:www.polit.mn