Ч.Бямбахажид

УИХ-ын гишүүн О.Амгаланбаатар “Мансууруулах эм, сэтгэцэд нөлөөт бодисын тухай хуульд шинэчилсэн найруулга оруулах” хуулийн төсөл санаачилж байгаа талаараа мэдээлэл хийлээ. Тэрээр “Өнгөрсөн зургаан сарын хугацаанд “Мансууруулах эм, сэтгэцэд нөлөөт бодисын тухай” хуулийн шинэчилсэн найруулгын судалгааг хийлгэж, бэлэн болгосон. Өнөөдөр Засгийн газарт хуулийн төсөлд санал авах бичгийг явуулж байна. Манай улсад хар тамхи, сэтгэцэд нөлөөт бодисын нөхцөл байдал хурцадмал байдалд хүрээд байна. Бидний хийсэн судалгаагаар хар тамхи, сэтгэцэд нөлөөт бодис хэрэглэгчдийн нас залуужиж байгаа нь харагдсан. 2002 онд баталсан “МАНСУУРУУЛАХ ЭМ, СЭТГЭЦЭД НӨЛӨӨТ БОДИСЫН ЭРГЭЛТЭД ХЯНАЛТ ТАВИХ ТУХАЙ” хууль 23 жилийн дараа цаг үетэйгээ уялдаж, өнөөгийн нийгэмд үүсэж байгаа нөхцөл байдлыг зохицуулж чадахгүй байна. Иймээс хуулийг зайлшгүй өөрчлөхөөс өөр аргагүй байгаа. Өнөөдөр хүчин төгөлдөр байгаа хуулиар мансууруулах бодис хэрэглэсэн хүмүүсийг Зөрчлийн хуулиар торгуулах болон баривчлах ялаар шийтгэж байна. Монгол Улсад хэрэгжиж байгаа “МАНСУУРУУЛАХ ЭМ, СЭТГЭЦЭД НӨЛӨӨТ БОДИСЫН ЭРГЭЛТЭД ХЯНАЛТ ТАВИХ ТУХАЙ” хууль маш сул байна. Ял авч байгаа тохиолдлуудыг авч үзвэл, зөвхөн үүнийг хадгаласан гэдгээр л шийтгэж байна. Хар тамхитай холбоотой ял, шийтгэлийг хоёр дахин өндөр байхаар заалтуудыг Эрүүгийн хуулинд оруулах хэрэгтэй гэдэг саналыг оруулсан. Үндсэндээ энэ хууль батлагдснаар мансууруулах эм, сэтгэцэд нөлөөт бодисын хэрэгт холбогдсон хүмүүсийн ял нь өндөрсөнө. Хэдэн жилийн өмнө манай улс хар тамхи дамжин өнгөрдөг байсан бол одоо бараг үйлдвэрлэгч улс болчихсон байна. Тиймээс холбогдох хуулийг яаралтайгаар өөрчлөх хэрэгтэй тул судалгаа хийлгэсний үр дүнд саналаа Засгийн газарт хүргүүлж байна” гэлээ. 

Эх сурвалж:www.polit.mn