Х.Хатанзориг

Анхдугаар Богд Г.Занабазарын мэлмий гийсний 390 жилийн ойд зориулсан “Өндөр гэгээн-Даншиг наадам” ирэх амралтын  өдрүүдэд  Өвөрхангай аймагт болно. Баяр наадмын үеэр зургаан насны болон сонгомол хурдан морьдын уралдаан, улс аймгийн алдар цолтой хүчит 512 бөхийн барилдаан болох билээ. Уг барилдааны түрүү бөхөд Улсын аварга Д.Сумъяабазар Лексус-600 маркийн автомашин гардуулна гэдгээ мэдэгдээд байна.  Тэгвэл бай шагналын хувьд харьцангуй өндөр тус барилдаанд одоогоор  Улсын аварга О.Хангай, Улсын арслан Ц.Содномдорж, Б.Орхонбаяр, Э.Оюунболд, Э.Батмагнай, улсын заан Б.Пүрэвсайхан, Н.Жаргалбаяр, Б.Бат-Өлзий, Д.Баасандорж, Д.Хүдэрбулга, С.Сүхбат тэргүүтэй 240 гаруй бөх бүртгүүлжээ.  Долоодугаар сарын 26-30-ны өдрүүдэд Увс аймаг үүсгэн байгуулагдсаны 100 жилийн ой болох гэж байгаа учир Дархан аварга Н.Батсуурь, Улсын аварга П.Бүрэнтөгс тэргүүтэй баруун аймгийн зарим бөх даншиг наадмыг өнжиж байгаа юм.

“Будаг нь ханхалсан” шинэ арслан Э.Батмагнай, Улсын харцага О.Наранбаатар нар энэ наадмын нэгэн чимэг нь болон барилдана. Дашрамд сонирхуулахад уг барилдаанд Япон улсын мэргэжлийн бөхийн тамирчин Ханада Хидэтора бүртгүүлсэн юм.

Тэр утгаараа энэ барилдаан бөх сонирхогчдын хувьд анхаарлын төвд байна.  Хүчит 512 бөхийг хэний хүү магнайлан түрүүлж автомашины түлхүүр гардан авах вэ гэдэг нь наадамчин олны дунд таамаг хэвээр. Шинэхэн цолтнууд эд хаваа гайхуулах уу.  Эсвэл улсын баяр наадамд өвдөг шороодсон том цолтнууд “даагаа нэхэх болов уу.

Эх сурвалж:www.polit.mn