Т.САЙХАН

УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох эрүүгийн хэргийг өнөөдөр /07.24/ Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд хэлэлцэж шийдвэрээ танилцуулав. 

Шүүх хуралдааны үеэр Б.Энх-Амгалангийн өмгөөлөгч хоёр үндэслэлээр хүсэлт гаргасан байна. Тодруулбал,"давж заалдах шатны шүүхээс тогтоол хүчингүй болж, анхан шатны шүүхэд ирсэн. Б.Энх-Амгалангийн бие муу эрүүл мэндийн асуудалтай байгаа тул цагдан хорих таслан сэргийлэх арга хэмжээг өөрчилж өгнө үү" гэжээ. Шүүхийн шийдвэрээр Зам, тээврийн сайд асан Б.Энх-Амгалангийн ял шийтгэгдсэн хэргийг хүчингүй болсон учир эрүүл мэндийн байдлыг харгалзан үзэж хилийн хориг тавьж суллахаар болжээ. УИХ-ын дарга асан З.Энхболдын хилийн хоригийг хэвээр үлдээж, хэргийг прокурорт буцаах шийдвэрийг шүүхээс гаргав.

Б.Энх-Амгаланг Зам тээврийн хөгжлийн сайдаар ажиллаж байхдаа эрх мэдэл албан тушаалын давуу байдлаа ашиглан, бусдад давуу эрх олгосон үндэслэлээр анхан шатны шүүхээс гэм буруутайд тооцсон. Харин З.Энхболдыг ЕТГ-ын дарга байхдаа мөн л эрх, мэдэл албан тушаалын байдлаа урвуулан ашиглан бусдад нөлөөлж, давуу байдал олгосон гэж үзэн Нүүрсний хэрэгт холбогдуулан шалгаж байгаа билээ. Тэдний шүүх хурал 2024 оноос хойш үргэлжилж буй. УИХ-ын дарга асан, Ерөнхийлөгчийн Тамгын газрын дарга асан З.Энхболд, УИХ-ын гишүүн, Зам тээврийн сайд асан Б.Энх-Амгалан нарт холбогдох эрүүгийн хэргийн давж заалдах шатны шүүх хурал өнгөрсөн дөрөвдүгээр сарын 30-ны өдөр Нийслэлийн Эрүүгийн хэргийн давж заалдах шатны шүүхэд болж, шүүхээс З.Энхболдыг цагаатгаж, Б.Энх-Амгаланд хоёр жилийн хорих ял оноосон анхан шатны шүүхийн шийтгэх тогтоолыг хүчингүй болгосон байдаг. Тэгвэл З.Энхболд, Б.Энх-Амгалан нар нь анхан болон давж заалдах шатны шүүхийн шийтгэх тогтоол, магадлалыг эс зөвшөөрч, Улсын дээд шүүхэд гомдол гаргасан байдаг.

Эх сурвалж:www.polit.mn