С.УРТНАСАН

УИХ-ын гишүүн, Засгийн газрын гишүүн, Батлан хамгаалахын сайд Д.Батлутын санаачилгаар Батлан хамгаалах салбарын бие бүрэлдэхүүний нийгмийн хамгааллыг сайжруулах бодлогын хүрээнд өнөөдөр /2025.07.23/ нийт 100 орчим алба хаагчдад орон сууцны урьдчилгаа 20 сая төгрөгийг олгох “Батламж”-ийг гардуулан өглөө.

Энэхүү хөтөлбөр нь Монгол Улсын Ерөнхийлөгчийн хэрэгжүүлж буй “Хүн төвтэй төр” нийгмийн хамгааллын шинэчлэл, Монгол Улсын Засгийн газраас баримталж буй хүний хөгжлийг дээдэлсэн “Хүн төвтэй бодлого”, Батлан хамгаалахын сайд Д.Батлутын Зэвсэгт хүчний офицер, ахлагч, ажилтан, алба хаагчдын нийгмийн хамгааллыг сайжруулахаар дэвшүүлсэн бодлогын хүрээнд хийгдэж буй гурван багц арга хэмжээний нэг гэнэ.

Батлан хамгаалахын сайд Д.Батлут хөтөлбөрт хамрагдаж буй тус бие бүрэлдэхүүнд хандан: “Улсын хөгжил, салбарын хөгжлийг яръя гэвэл эхлээд хүний хөгжлийг ярих ёстой. Хүний хөгжлийг ярихын үндэс суурь нь нийгмийн хамгааллын асуудал мөн. Батлан хамгаалахын сайдаар томилогдохдоо хэлж байсан үг өнөөдөр эхнээсээ ажил хэрэг болж байна” гэв.

Батлан хамгаалах салбарын бие бүрэлдэхүүний нийгмийн хамгааллыг сайжруулах хөтөлбөр орон сууцны урьдчилгаагаар тогтохгүй ипотекийн зээлийн шаардлага хангасан ажилтан алба хаагчдад хүлээлт үүсгэлгүйгээр хамрагдахад дэмжлэг үзүүлэх, өрхийн үйлдвэрлэл эрхэлж буй алба хаагчдын гэр бүлд “Тоног төхөөрөмжийн дэмжлэг үзүүлэх хөтөлбөр”-үүдээр үргэлжилнэ гэсэн юм.

Эх сурвалж: polit.mn