С.УРТНАСАН

Оросын Холбооны Улсын Засгийн газрын 2024 оны 11 дүгээр сарын 7-ны өдрийн 1510 тоот тогтоолоор баталсан “Гадаадын иргэн болон харьяалалгүй хүмүүсийг Оросын Холбооны Улсад зорчих журам, нөхцөлийг шалгах туршилтыг хэрэгжүүлэх тухай” шийдвэрийн дагуу 2025 оны зургаадугаар сарын 30-аас эхлэн ОХУ-ын нутаг дэвсгэрт визгүй нэвтрэх журамд зарим нэг өөрчлөлтүүд орсон билээ.

Шинэ журмын дагуу ОХУ-д зорчихоор төлөвлөж буй гадаадын иргэд хил нэвтрэхээс 72 цагийн өмнө гар утасны “Gosuslugi RuID” аппликейшнд бүртгүүлж, QR код авах шаардлагатай бөгөөд QR кодыг үүсгэхийн тулд гадаад улсын иргэн дээрх программаар хувийн мэдээллээ бөглөж, өөрийн зургийг байршуулан, тус улсад байх хугацаагаа оруулах юм.

Программын тусламжтайгаар бүртгэл хийгдсэний дараа QR код үүсэх бөгөөд хилээр нэвтрэх үед биометрийн зураг, хурууны хээ таараагүй үед зорчих боломж хязгаарлагдана. Харин хилээр нэвтэрсний дараа 10 хоногийн дотор банкин дээр биеэр очиж биометрийн өгөгдлөө баталгаажуулах шаардлагатай. Баталгаажуулалтыг хийлгэснээр ОХУ-д сим карт худалдан авах, RuID гар утасны программд байгаа үйлчилгээг авах боломж бүрэн нээгдэнэ.

ОХУ-д суугаа дипломат төлөөлөгчийн газрын ажилтнууд болон тэдний гэр бүлийн гишүүд, тус улсад түр болон байнга оршин суух зөвшөөрөл бүхий иргэд, ОХУ-д нэвтрэх бүх төрлийн визтэй иргэд, зургаагаас доош насны хүүхэд заавал бүртгүүлэх шаардлагатай. Мөн гадаад улсын иргэн ОХУ руу нэвтрэх хүсэлт гаргаснаас хойш 90 хоног өнгөрч, ОХУ-д нэвтрээгүй бол QR кодыг дахин авах хэрэгтэй.

Дэлгэрэнгүй журам, нөхцөлтэй ЭСЯ-ны цахим хуудас болон Оросын төрийн болон орон нутгийн үйлчилгээний нэгдсэн портал цахим хаягаар орж танилцана  уу:

https://www.gosuslugi.ru/landing/new_entry_rules