Ч.БЯМБАХАЖИД

Тулгар төрийн 2234, Их Монгол Улсын 819 жил, Үндэсний эрх чөлөө тусгаар тогтнолоо сэргээн мандуулсны 114, Ардын хувьсгалын 104 жилийн ойн Үндэсний их баяр наадам өргөн дэлгэр болж өндөрлөлөө.

Эрийн гурван наадмын нэг сур харваа уламжлал ёсоор урианхай сурын харваагаар эхэлж, энэ жил нийт 640 гаруй харваач цэц мэргэнээ сорилоо.

Үндэсний сурын харваанд эрэгтэй харваачдаас Баян-Өлгий аймгийн Буянт сумын уугуул, “Алдар” спорт хорооны харваач Хайдавын Хүрэлтуяа 40 сумнаас 38 сум онож тэргүүн байр эзэлсэн. Ингэснээр “Улсын мэргэн” цол хүртсэн юм.

Харин эмэгтэй харваачдаас Дорнод аймгийн Хөлөнбуйр сумын уугуул, Дорнод аймгийн Баяндун сумын харьяат, Халиун-Өндөр багийн харваач Чагнаадоржийн Гандаваа 40 сумнаас 38 сум онож тэргүүн байр эзэлснээр мөн “Улсын мэргэн” цолтон болсон.

Харин зөвхөн эрчүүд харвадаг онцлогтой урианхай сурын харваанд энэ жил нийт 317 харваач цэц мэргэнээ сорьсон юм. Үүнээс Баян-Өлгий аймгийн Буянт сумын харьяат, аймгийн мэргэн, спортын мастер Хөхийн Мягмаржав 27 оноогоор товх харван түрүүлж, урианхай сурын улсын мэргэн цолны болзол хангажээ.

Буриад сурын харваанд 240 харваач шинэчлэгдсэн дүрмээр буюу 48 сумаар мэргэнээ тодрууллаа.

Улмаар Өвөрхангай аймгийн Баянгол сумын харьяат, спортын дэд мастер Цэвээндоржийн Ганбаатар 47 оноогоор түрүүлсэн бол эмэгтэй харваачдаас Дархан-Уул аймгийн харваач Загдаагийн Болормаа 44 оноогоор түрүүлж, улсын мэргэн цолны болзол хангасан юм.