Ч.БЯМБАХАЖИД

Энэ жилийн наадмын нэгэн чухал онцлог нь Япон улсын Цог Жавхлант Эзэн Хаан Нарүхито, Эрхэм Дээд Хатан Масако нар манай улсад төрийн айлчлал хийж, Монгол түмний их баяр цэнгэл Үндэсний их баяр наадмыг үзсэн явдал байлаа. Хүндэт зочид баяр наадмын нээлтийн тоглолтыг тольдож, сурын талбай, шагайн харвааны асраар зочилсон юм. Мөн Хүй долоон худагт соёолонгийн уралдаан үзэж сонирхсон зэрэг онцлох үйл явдал байлаа.

Баяр наадмын нээлт, хаалтын тоглолт “Мөнхөд гэрэлтэх Монгол” сэдвийн дор монгол хүний оюун сэтгэлгээ, ёс заншил, түүхэн бахархлыг илтгэсэн долоон үндсэн хэсэгтэй уран сайхны тоглолтыг наадамчин олонд үзүүлэв. Энэ жилийн наадмын нээлт, хаалтын ерөнхий найруулагчаар Төрийн соёрхолт, Урлагийн гавьяат зүтгэлтэн Н.Наранбаатар ажилласан юм. 

Энэ жилийн баяр наадмын бэлтгэл ажлыг есөн салбар хороо, 236 ажилтан, албан хаагч хариуцан ажиллажээ. Баяр наадмын нээлт, хаалт, соёл урлагийн арга хэмжээнд нийтдээ 2500 уран бүтээлч, 40 гаруй мэргэжлийн урлагийн байгууллага, хувийн хэвшлийн 100 гаруй байгууллага оролцсон байна.

Үндэсний их баяр наадмын нээлтийн үйл ажиллагаа уран сайхны гүн агуулга, найруулга, дэглэлттэйгээр үргэлжилж монгол ухаан, өв соёл, үнэт зүйлийг шингээсэн байлаа.

Монгол Улсын Ерөнхийлөгч У.Хүрэлсүх Үндэсний их баяр наадмыг нээж үг хэлэхдээ “Монголчууд бид агуу их хааныхаа үр сад, Их Монгол Улсынхаа гал голомтыг сахин суугаагаа гүнээ ухамсарлан, Их Эзэн хааныхаа суу алдар, үйл хэргийг эрхэмлэн дээдэлж, даган мөрдөж, төрт ёсны үнэт зүйл өв соёлыг үр хүүхдүүддээ өвлүүлэн үлдээж, эв нэгдлээ бататган бэхжүүлж хүчирхэг Монгол Улсыг цогцлоон байгуулахын төлөө хүчин зүтгэх учиртай” хэмээн онцолсон юм.