П.ЛХАГВАЖАРГАЛ

Тулгар төрийн 2234 жил, Их Монгол Улсын байгуулсны 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн үндэсний их баяр наадмын хурдан дааганы уралдаанд 127 хүлэг морджээ. Тэдний дундаас Төв аймгийн Дэлгэрхаан сумын Монгол Улсын тод манлай уяач Ш.Мөнгөншагайн сартай хээр түрүүлсэн бол Дундговь аймгийн Луус сумын харьяат аймгийн алдарт уяач Э.Улаанхүүгийн хул халзан аман хүзүүдсэн юм.

Э.Улаанхүү уяач уржнан жил “Түмний хар” үрээгээ түрүүлгэж, “Дундговийн дурантай уяач” гэдгээрээ алдаршсан билээ. Энэ жил мөн тэрээр ганц даагатай ирж айраг хүртэн, Төв цэнгэлдэхэд цоллуулаад байна. “Төрийнхөө наадамд даага аман хүзүүнд хурдлуулаад сайхан байна. Төв цэнгэлдэхэд орж ирэхэд гэртээ ирсэн мэт санагдаж байна” гэж баярын сэтгэгдлээ хуваалцсан юм. Түүнчлэн Хул даага маань Дундговь аймгийн Хулд сумын харьяат аймгийн алдарт уяач Будын Ариунболд гэдэг ахын маань унаган даага. Ноднин эхээс унахад нь надад бэлэгт өгч байсан. Хавар Мандлын хурдад айргийн тавд орсон. Өвөрхангай аймагт очиж зүүн бүсийн уралдаанд түрүүлсэн. Сая Булган аймгийн наадамд түрүүлээд ирсэн” гэв.