П.ЛХАГВАЖАРГАЛ

Төв аймгийн Бүрэн сумын уугуул, Монгол Улсын Манлай уяач Х.Улам-Өрнөхийн хээр шүдлэн  Ардын хувьсгалын 104 жилийн ойгоор айргийн дөрөвт давхилаа. Тэрээр хээр үрээгээ өнгөрсөн жил хүй мандлын дэнжид даага насанд түрүүлгэж байв.

Энэ жил хурдан хүлгээ хөтлөн Төв Цэнгэлдэхэд гийнгоон дуутай орж ирэхэд нь хэсэг хором ярилцсан юм. Тэрээр “Маш их баяртай байна. Өв уламжлалаа тээж яваа бид улсын наадмыг хүлээж үр дүнгээ хардаг. Төв цэнгэлдэхдээ орж, мориныхоо цолыг дуудуулах хүсэлтэй байдаг. Хүсэл маань биелээд сайхан байна” гэсэн юм.

Түүний хувьд улсын наадмын торгон дэнжид сүргийн манлай азарга хүртэл айрагдуулж нутаг орныхоо нэрийг гаргаж яваа нэгэн билээ. Манлай уяачийн төрөлх нутаг Бүрэн сумынхан энэ жил мөн түүхэн ойгоо тэмдэглэсэн. “Ж.Самбуу гуайн мэндэлсний 130 жилийн ой, Бүрэн сум үүсэж хөгжсөний 101 жилийн ой тохиож байна. Нутгийн зон олондоо баярын мэнд хүргэе. Төв аймгийн Бүрэн сум гээд дуудахад л нутгийн минь заяа түшиж, сайхан болдог” гэж овоглож явдаг нутгийнхаа тухай бахдан хуваалцсан юм.

Тэрээр Тод манлай уяач С.Эрдэнэбат, Тод манлай уяач О.Батбилэгтэй багын найзууд ажээ. Тэд багаасаа Тод манлай уяач Д.Ононгийнд тоглож өсжээ. “Морийг маань С.Эрдэнэбат найз маань уядаг. Бид хамдаа болохоос нь болохгүй хүртэл явж байна. Энэ амжилт олон хүний хүч хөдөлмөр байдаг. Энэ жил Хэнтий аймгийн Дархан сумын Бор-Ухаа гэдэг газар ногоолсон. Мөн туслах уяач Чингэрэл ахынх хүү Амарсанаа дүү болон эхнэрт нь баярлалаа. Унаач хүү Түвшинтөгсдөө баярлалаа” гэв.