Ө.Саруул

МҮЭ-ийн холбооны гишүүд дөрвөн жилд нэг удаа хуралддаг МҮЭ-ийн холбооны ерөнхийлөгчийг сонгох хурлыг нууцаар, хаалттай хийх гэж байгааг эсэргүүцэж, МҮЭ-ийн холбооны Ерөнхий зөвлөлд шаардлага хүргүүллээ. Тодруулбал, МҮЭ-ийн Их хурал хэзээ, хаана болох, хэн нэр дэвших талаар бүх гишүүдэд мэдээлэл өгөөгүй ба нийт гишүүдийн 0,1% буюу 200 гишүүнээр төлөөлүүлэн нууц хурал хийх гэж байгаа юм.

Монголын үйлдвэрчний эвлэлийн холбооны гишүүн Э.Адъяасүрэн: “-МҮЭ-ийн холбоо 108 жилийн түүхтэй 21 аймагт салбар холбоотой иргэний нийгмийн байгууллага. 200 мянга гаруй гишүүнтэй байгууллага маань дөрвөн жилд нэг удаа их хурал зохион байгуулдаг. Гэтэл энэ жилийн их хурал нууцаар явагдах гэж байна. Жирийн гишүүд бидний хувьд энэ хурал хэзээ, хаана болох, хурлаар хэлэлцэх асуудлын төлөвлөгөө, нэр дэвшигчдийн мэдээлэл бүгд хаалттай байна. МҮЭ-ийн холбооны дүрмийн 15-р бүлэгт “Их хурлаар хэлэлцсэн батлах баримт бичгийн төслүүдийг урьдчилан боловсруулж, их хурал хуралдахаас нэг сараас доошгүй хугацаанд хэвлэл мэдээллийн хэрэгслээр хэлэлцүүлэн явуулна” гэсэн байдаг. Гэтэл МҮЭ-ийн холбоо энэ дүрэм заалтаа хэрэгжүүлээгүй. Хоёр зуун мянган гишүүдийг 200 гишүүн, дарга нараар төлөөлүүлж нууц хурал хийх гэж байгаа ба энэ нь нийт гишүүдийн 0,1%-ийг эзэлж байгаа юм. 200 хүнээр сонгогдсон ерөнхийлөгч үйлдвэрчний эвлэлийн гишүүдийг биш, улс төрийн байгууллагыг төлөөлж, УИХ-ын гишүүн болдог. Үе үеийн МҮЭ-ийн ерөнхийлөгч нар өнөөдөр УИХ-ын ордонд сууж байна. Тийм учраас энэ хурлыг нээлттэй болгох, бүх гишүүдийг оролцоог хангахыг шаардаж байна” гэв.

МҮЭ-ийн холбооны гишүүн Д.Гүнсмаа: “-МҮЭ-ийн холбоо хөдөлмөрчдийн нийгмийн баталгаа, цалин хөлс, орлогыг нэмэгдүүлэх гэсэн үндсэн гол үүрэгтэй. Хоёр сарын өмнө Монгол хүний хөдөлмөрийн хөлсний доод хэмжээг 660,000-792,000 төгрөг болгож байсан. Гэтэл өнөөдөр 792,000 төгрөгөөр амьдрал ахуйгаа авч явах тийм нөхцөлд байгаа юу? Энэ бол үнэхээр хангалтгүй хэмжээ. Боловсрол, эрүүл мэнд, эрчим хүчний салбарт ажиллаж буй гишүүд МҮЭ-ийн байгууллагад жилд  дунджаар 450-500,000 төгрөгийн татвар төлдөг. Чадварлаг ажлын алба, сайн хуульч, засгийн газарт шаардлага тавьж, хөдөлмөрчдийн амьжиргааг ярьж хэлэлцэх ёстой хүмүүс өнөөдөр улс төр лүү шургалж орохыг л зорьдог боллоо. Олон нийтийн засаглалтай, ил тод, нээлттэй зарчимтай энэ байгууллага санхүүгийн тайлангаа тавьдаггүй” гэлээ.

МҮЭ-ийн холбооны гишүүн Д.Ган-Эрдэнэ: “-Үйлдвэрчний эвлэлийн үе үеийн удирдлагууд гишүүдийнхээ хөдөлмөр эрхлэлт үүнтэй холбоотой хууль ёсны ашиг санааг хамгаалах үүрэгтэй байдаг. Гэтэл тэд улс төрийн намд харьяалагдан их хурлын гишүүн болох зорилготой ажиллаад эхэлсэн. Тэд өөрсдийн байгууллагын дүрмээ зөрчиж байна. Ядаж их хурлаа 0,1% буюу 200 бус, нэг хувь буюу 2000 мянган гишүүнтэй хийхийг шаардаж байна” хэмээлээ.

Эдгээр МҮЭ-ийн холбооны гишүүдийн төлөөлөл байгууллагаа шинэчлэх шаардлагатай байгаа тул үйл ажиллагаагаа нээлттэй болгохыг уриалж, өнөөдрөөс эхлэн албан ёсны зөвшөөрөлтэйгөөр МҮЭ-ийн холбооны гадна талбайд жагсаал цуглаан хийхээ мэдэгдлээ.