Г.Энхжин

“Баялагтаа эзэн” ТББ-аас Үндсэн хуульд заасан эрхийн хүрээнд ард түмэнд стратегийн ордуудын өгөөж бүрэн хүртээмжтэй байх ёстой гэж үзэж байгаагаа илэрхийлэн, уурхайчдын эрх ашгийг хамгаалахыг төр засгаас шаардаж “Үндэсний мэдээллийн төв”-д хэвлэлийн хурал хийлээ.

Тус ТББ-ын төлөөлөл Г.Хажидмаа ‘’Гаднын орныхон Монгол уурхайчдыг хөдөлмөрийн мөлжлөгт оруулж байна. Маш олон жилээр нийгмийн даатгалыг нь төлдөггүй, хаанаас авсан тодорхойгүй махаар хоол хийж өгдөг зэрэг олон ноцтой мэдээлэл ирж байна. Томоохон ЭТТ ХК-тай холбоотой хоёр, гурав компани 1000 орчим уурхайчдын эрх ашгийг зөрчиж байгаа учраас удаа дараа ЭТТ ХК шаардлага өгсөн ч харамсалтайгаар энэ асуудлыг зөвшилцөлд хүргэж чадахгүй байна. Хятад компаниуд бид бүхний үгэнд орохгүй, “манай компанийн асуудал та нарт хамаагүй” гэдэг байр суурь илэрхийлж байна гэж ЭТТ удирдлагууд гэрээ хийсэн компаниудынхаа өмнө хэлж байгаа учраас Монгол Улсын Ерөнхийлөгч болон “Эрдэнэс Монгол”-д хандахаар албан бичгүүдийг бэлдэн ирсэн байна. Монгол Улсын Үндсэн хуульд захирагдахгүйгээр уул уурхайн баялгийг гадны орнууд сүүлийн 30 жилийн хугацаанд ашиглаж, хамаг баялгийг урсгалаа. Өнөөдөр хэн хохироод үлдэж байна вэ? Монголчууд бид л хохироод үлдэж байгаа. Мянга мянган уурхайчдын эрх ашгийг УИХ-ын гишүүдээс хэн нь ч хамгаалсангүй’’ гэв.

 Мөн Ж.Эрдэнэбилэг “2024 онд нэг тонн нүүрсийг газрын хөрснөөс хуулж олборлоход 6500 төгрөгийн зардал гарсан. Гэвч тухайн нүүрсийг 160 ам.доллараар борлуулж байгаа нь 90 дахин ашиг олж байгааг харуулж байна. Гэсэн ч энэ ашиг ажилчдад хүрэхгүй байна” хэмээн байр сууриа илэрхийлэв.

“Геологи уул уурхайн тэмүүлэл” ТББ-ын удирдах зөвлөлийн дарга Б.Ононхангай “Монгол Улсын Хөдөлмөрийн тухай хуульд өдөрт найман цаг ажиллана гэж заасан байдаг ч энэ зүйл заалтаа биелүүлдэггүй. Амралтын мөнгийг бүрэн олгодоггүй, цалин хасдаг. Ажилчид эрх ашгаа хамгаалж компанидаа хандсан ч та нар олсон мөнгөтэйгөө тааруулж амьдраарай’ гэж доромж хандсан. Үүний улмаас олон уурхайчид ажил хаялт зарлаж, ЭТТ-ийн үйл ажиллагааны 60 хувь нь доголдох цаашлаад ард түмний авдаг 1072 хувьцаа бүх л эдийн засагт сөрөг нөлөөтэй учир байгууллага болон төр оролцох хэрэгтэй. Уурхайгаас гарах хамгийн том баялаг бол уурхайчин байдаг шүү’’ гэлээ.

Эх сурвалж:www.polit.mn