Монгол Улсын Засгийн газрын хэрэгжүүлэгч агентлаг-Төмөр замын газрын дарга Б.Артур тэргүүтэй төлөөлөгчид Төмөр Замуудын Хамтын Ажиллагааны Байгууллага (ТЗХАБ)-ын Сайд нарын 52 дугаар чуулганд оролцохоор 2025 оны зургадугаар сарын 10-13-ны өдрүүдэд БНХАУ-ын Чиндао хотноо ажиллалаа.

Энэ жилийн ээлжит чуулганд Азербайжан, Беларусь, Вьетнам, Хятад, Солонгос, Лаос, Монгол, Польш, Орос, Узбекстан зэрэг тус байгууллагын гишүүн 21 орны Зам тээврийн асуудал эрхэлсэн сайдын эрх олгосон төлөөлөгчид, мөн урилгаар Транс-Евразийн тээврийн олон улсын зохицуулах зөвлөлийн удирдлагууд зэрэг 110 гаруй гадаад, дотоодын зочид төлөөлөгчид оролцсон юм.

ТЗХАБ-ын Хорооны дарга Мирослав Антонович чуулганы нээлтийн үеэр Чиндао хотноо зохион байгуулагдаж буй Сайд нарын 52 дугаар чуулганаар оролцогч талууд үр өгөөжтэй хэлэлцүүлэг өрнүүлж, тулгамдаж буй асуудлуудыг шийдвэрлэх санал санаачилгыг дэвшүүлж, бүтээлч үр дүнд хүрч ажиллахыг хүсэж байгаагаа онцолж, арга хэмжээний бэлтгэл ажлыг өндөр түвшинд хангаж, хуралд оролцогчдыг халуун дотноор хүлээн авч байгаа БНХАУ-ын талд талархал илэрхийлэв.

ТЗХАБ-ын гишүүн орнуудын төлөөлөгчид гурван өдрийн турш үргэлжилсэн Сайд нарын чуулганаар:

• ТЗХАБ-ын 2024 оны ажлын тайлан, Хяналтын шалгалтын хороо, Тээврийн бодлого болон хөгжлийн стратегийн хороо, Тээврийн эрх зүйн хороо, Төмөр замын тээврийн салбарын мэргэжлийн боловсрол/сургалтын асуудал эрхэлсэн түр ажлын хэсгийн 2024 оны ажлын үр дүнгийн тайланг сонсож, эдгээр хороо, ажлын хэсгийн үйл ажиллагааг сайжруулах зохих саналыг дэвшүүлж, протоколын төсөлд тусган ирэх жилээс мөрдөхөөр шийдвэрлэв.
• ТЗХАБ-ын 2026 он болон цаашид хэрэгжүүлэх үйл ажиллагааны төлөвлөгөө, ТЗХАБ-ын гишүүн орнуудын Хамтын ажиллагааг өргөжүүлэх тухай санаачилга, Хорооны 2025 оны эцсийн төсөв, 2026 оны урьдчилсан төсвийг тус тус хэлэлцэн батлав.
• ТЗХАБ-ын Хорооны суугаа орныг солих эсэх, Хорооны дарга, дэд ажлын хорооны дарга, мэргэжилтнүүдийн ажил үүргийн хуваарь, Хорооны удирдлагуудыг томилох асуудлуудыг хэлэлцэн тохиролцов.
• ТЗХАБ-ын гишүүн орнуудын Сайдын нарын хурлыг зохион байгуулах орнуудын дарааллыг тогтоож, ирэх 53 дугаар Сайд нарын чуулганы хэлэлцэх асуудал, байршил, хугацааг хэлэлцэн тогтов.

Төмөр замын газрын дарга Б.Артур дээрх хурлын протоколд Монгол Улсын Зам, тээврийн яамыг төлөөлөн гарын үсэг зурж баталгаажууллаа. Мөн хурлын үеэр бусад орны төлөөлөгч нартай ажлын уулзалт хийж, хоёр талын төмөр замын хамтын ажиллагааны асуудлаар санал солилцов.

Түүнчлэн чуулганы үеэр БНХАУ-ын CRRC, CREC, CCCC, CRCC, CRSC, Ланьжоугийн Зам харилцааны их сургууль зэрэг БНХАУ-ын төмөр замын тээврийн салбарын тэргүүлэх аж ахуйн нэгж, байгууллагын бүтээгдэхүүн, технологийн үзэсгэлэн дэлгэгдсэн бөгөөд нийт хуралд оролцогч нар тус улсын өндөр хурдны төмөр замын зорчигч тээврийн CRH, CR cерийн хөдлөх бүрэлдэхүүн үйлдвэрлэгч “Си Ар Ар Си Чиндао Сифан” ХХК-ийн үйл ажиллагаа, тус компанийн хөгжүүлж буй 600 км/цаг хүртэл хурдлах маглев галт тэрэгний технологитой газар дээр нь танилцаж, туршлага судлав.