Б.Бямбадулам

Ламхай нарыг хүчирхийлсэн хэргээр анхан шатны шүүхээс 12 жилийн ял авсан хүүгийн ар гэрээс өнөөдөр Үндэсний мэдээллийн төвд мэдээлэл хийлээ 2023 оны зургаадугаар сараас Гандантэгчэнлин хийдэд шавилан суудаг бага насны хүүхдүүд буюу ламхай нар бэлгийн хүчирхийлэлд өртсөн талаарх мэдээлэл хэвлэл мэдээллийн хэрэгслээр цацагдсан. Тухайн үед гэмт хэргийн шинжтэй энэхүү  мэдээллийг Баянгол дүүргийн цагдаагийн нэгдүгээр хэлтсээс хэргийн бүртгэл нээн шалгаж эхэлсэн. Хоёр жилийн хугацаанд үргэлжилсэн уг хэрэгт холбогдогч хүүг анхан шатны шүүхээс 12 жилийн хорих ял оноосон байна. Шүүхийн энэхүү шийдвэрийг баримт нотолгоогүй хэмээн түүний ар гэрийнхэн үзэж байна. Хүүгийн ээж С.Саранчимэг “Миний хүүг ямар ч  нотлох баримтгүйгээр насан хүрээгүй хүүхдийн худал үгээр 12 жилийн хорих ял оноосон. Гэмт хэрэгт болоогүй гэдэг нь илэрхий үнэн зөв нотолгоо олж өгсөөр байхад ийм шийдвэр гарсанд үнэхээр харамсалтай байна. Энэ  гүтгэлэгт гол үүрэг гүйцэтгэсэн Х гэгч эмэгтэй ёс суртахууны дээд зэргийн зөрчилтэй, маш авьяаслаг бүсэлхийнээс доош асуудлаар хүн гүтгэж мэргэшсэн жүжигчин юм. Миний том охиныг цагдаагийн үүдэнд барьсан зүйлээрээ зодож, хүүг маань шоронд орохгүй бол шороонд булна хэмээн сүрдүүлж заналхийлж байсан нь бүгд жүжиг юм. Тухайн хүүхэд мэдүүлэг өгөхдөө худлаа хэлсэн гэдгээ хэд хэдэн удаа хэлсэн. Уг нотлох баримтыг шүүхийн байгууллагад өгсөн. Миний хүү төлөв даруу, үг дуу цөөтэй, маш хүнлэг чанартай, эрдэм номдоо сайн, гурван хэлээр төвөггүй ярьдаг, авьяаслаг хүүхэд шүү дээ. Дөнгөж эхэлж байгаа амьдралыг нь бүү золиослооч, гэм буруутай атлаа шоронд суух ёстой гэж үү. Миний эрдэм номтой ламхай байсан хүү яагаад хилс хэргээр гүтгэгдэх ёстой юм бэ.  Эрхэм хүндэт түмэн олон, шүүгчдэд хандаж хэлэхэд хүүгийн гэм буруугүй гэдгийг цагаатгаж өгөөч. Гүтгэж худлаа мэдүүлэг өгч зохион байгуулж оролцож буй хүмүүсийг шударгаар олж тогтоож өгөөч. Бид чинь хүнлэг ардчилсан иргэд биз дээ. Хүнд өвчтэй миний бие хүүгээрээ асруулмаар байна. Миний хүүг гэм буруугүйг тогтоож учрыг олж өгөөч гэж гуйя” гэлээ. Харин хүүгийн  төрсөн эгч Б.Соёлмаа “Манай гэр бүлийн хувьд 2023 оны зургаадугаар сараас эхлээд хоёр жилийн турш хохирогч болсоор явж байна. Бид энэ хугацаанд маш олон баримтууд цуглуулж, хууль хяналтын байгууллагад хандсан ч авч хэлэлцээгүй. Нотлогдохгүй байсан энэ хэргийг анхан шатны шүүх дээр тухайн хүүхдийн аман мэдээлэл дээр үндэслэн хорьчихлоо. Шүүх шинжилгээний байгууллагаар нотлогдоогүй боловч энэ бүхнийг үнэн бодитоор нь шүүж өгсөнгүй. Миний дүү 12 жил Энэтхэг улсад суралцаад ирсэн учраас монгол хэлээр сайн ярьж өөрийгөө ойлгуулж чадахгүй. Биднийг шүүх хуралдааны үед хаалттай гээд оролцуулдаггүй. Эхлээд  гүтгэсэн хүүхэд нь монголд байхгүй үеийг нь хэлж маш олон удаа он цагийг нь буруу хэлсэн. Нотлогдохгүй байгаа боловч миний дүүг хоёр ч удаа хорилоо. Монгол Улсын хүний эрхийн байгууллага гэж байдаг бол бидэнтэй холбогдож туслахыг хүсэж байна. Бидэнд зөвлөгөө өгөх хүн олдохгүй хэцүү байна. Он цагийг дахин өөрчилж миний дүүг гэм буруутай хэмээн нийгэмд таниулж байгаад бидний зүгээс маш их хохиролтой байна” гэлээ.

Эх сурвалж:www.polit.mn