Г.Энхжин
ТҮЦ эрхлэгчид маргааш буюу энэ сарын 18-ны өдрөөс эхлэн нүүдлийн маягаар ТҮЦ ажиллуулах үзэсгэлэн худалдааг зохион байгуулахаар болжээ. Эхний үзэсгэлэн худалдааг Төв талбайд зохион байгуулна гэв. Энэ талаар ТҮЦ эрхлэгчид “Үндэсний мэдээллийн төв”-д мэдээлэл хийлээ. ТҮЦ эрхлэгч Н.Уранчимэг “Улаанбаатар хотын Засаг дарга Х.Нямбаатар нь ТҮЦ эрхлэгчдэд зах, худалдааны төвүүд болон GS25 сүлжээнд ажил зуучлан санал болгож буйгаа мэдэгдсэн ч энэ нь үндэслэлгүй мэдээлэл юм. Сүүлийн гурван хоногт бид бүх захууд, ажил олгогч нартай холбогдсон бөгөөд GS25-д биечлэн очиж уулзсан ч ТҮЦ эрхлэгчдийг ажилд авах талаар ямар ч гэрээ, хэлцэл байхгүй гэсэн тайлбар өгсөн. Гэвч Хотын дарга “бид нараас судалгаа авсан” хэмээн мэдэгдсэн нь ташаа ойлголт төрүүлж байна. Мөн ТҮЦ эрхлэгчдийн зүгээс GS25 сүлжээнд өндөр цалинтай ажлын байр санал болгож буй гэх амлалтаар олон иргэнд буруу ойлголт төрүүлж, хуурч байна. Өнөөдөр биднийг доромжилж байна. Өмнөх засаг дарга нар өөрсдөө ТҮЦ зарж бизнес хийж байсан хэр нь өнөөдөр биднийг гэнэт гарч ирсэн мэтээр гүтгэж байгаад гомдолтой байна. Энэ бол хууль бус үйлдэл” гэлээ.
Мөн тэд Ерөнхийлөгч У.Хүрэлсүхэд хандан шаардлага хүргүүлж, хүний эрх зөрчсөн энэ асуудлыг шийдвэрлэхийг хүслээ. ТҮЦ эрхлэгчдийн нэгдсэн холбооноос дараах шаардлагыг хүргүүлж байна. Шаардлагад,
- ТҮЦ эрхлэгчдэд хүнлэг бус хандахыг зогсоох
- Үндсэн хууль болон захиргааны ерөнхий хуулийг зөрчсөн үйлдлийг нэн даруй таслан зогсоох
- 2025 оны хоёрдугаар сарын 14-ны өдөр гарсан Нийслэлийн Засаг даргын А/237 дугаар захирамжийг хүчингүй болгох
- Хуулийг чанд сахин биелүүлж, хуулийн дагуу ажиллах.Эдгээр шаардлагын хариуг 2025 оны зургадугаар сарын 23-ны дотор өгөхийг ТҮЦ эрхлэгчид шаардаж байна гэлээ.
Эх сурвалж:www.polit.mn