Г.Энхжин

Монголын уламжлалт анагаах ухаанд оношилгоо, эмчилгээний олон төрлийн арга байдаг. Тэдгээрийн нэг нь хүний таван мэдрэхүй буюу амтлах, үнэрлэх, харах, сонсох, хүрэхүйд тулгуурлан дотоод болон гадаад эрүүл мэндийг тэнцвэржүүлэх эмчилгээний арга юм. Энэхүү эмчилгээний арга нь хөгжмийн авиа, уламжлалт дуу хөгжим, байгалийн чимээ зэрэг дуу авианы элементүүдийг ашиглан хүний сэтгэл зүй болон бие мах бодид эерэг өөрчлөлт авчрахад чиглэдэг.

Бурхан багшийн Их дүйчэн өдрийг тохиолдуулан, сүсэгтэн олны сэтгэлийг ариусгаж, эрүүл мэндийг дэмжих зорилготойгоор морин хуурын аялгуу, уртын дуу, хөөмийн цуур хөгжмөөр 30–40 минут үргэлжилсэн хөгжмийн бясалгал эмчилгээний арга хэмжээ боллоо.  Монголчуудын эртний нүүдэлчин ахуйд авиа хөгжмийг өргөн хэрэглэдэг байсан уламжлал бий. Тухайлбал, авиагаар таван хошуу малтайгаа харьцах, уртын дуу дуулах, морин хуурын аялгуу эгшиглүүлэх зэрэг нь бүгд хүний таван мэдрэхүйг сэргээж өгдөг.

“Зөн тэжээхүй” ухааны төвийн авиа эмчилгээ хариуцдаг мэргэжилтэн Ж. Мөнхжаргал “Хөгжмийн бясалгал нь хүний дотоод сэтгэлийг тайвшруулж, амар амгалан төлөвт хүргэхэд чиглэдэг. Мөн хүний биеийн хурдны системийг тогтворжуулах, нойргүйдлийг арилгах, стрессийг бууруулах гээд олон талын ач холбогдолтой. Манай төв хүний таван мэдрэхүйг зэрэг идэвхжүүлж, авиан эмчилгээний цогц аргачлалыг хэрэгжүүлэн ажилладаг. Мөн сар бүрийн Шинийн 15-ны өдөр олон нийтэд зориулан авиа  эмчилгээний хөтөлбөр хэрэгжүүлдэг. Шинийн 15-нд хийдэг шалтгаан нь сарны нөлөөгөөр усны эрчим маш өндөр болсон байдаг тул авиагаар эмчлэхэд  маш хурдан өөрчлөлт үзүүлдэг, авиа эмчилгээгээ Монголын анагаах ухааны оношилгоон дээр суурилж хийдэг онцлогтой” гэлээ. Ийнхүү Монголын уламжлалт анагаах ухаан , хөгжмийн соёлын нэгдэл нь орчин цагийн эрүүл мэндийн практикт зохицон хөгжиж, таван мэдрэхүйг эмчилгээний шинэ гарц болгон хэрэглэсээр байна.

Эх сурвалж:www.polit.mn