Б.Бямбадулам

Монголд “Gentle” нэрээр урлагийн тайзнаа хөл нийлүүлэн алхаж өөрийгөө эрүүл саруул болгохын төлөө уран бүтээлээ туурвиж эхэлсэн М.Мэндбаяр зургаадугаар сарын 15-нд онлайн хандивын тоглолтоо Монгол улсын Хүүхэлдэйн театрт хийх болсон талаар “Үндэсний мэдээллийн төв”-д мэдээлэл хийлээ. Анх гурван настайдаа бөөрний архаг үрэвсэлтэй болж 23 жилийн турш эрүүл болохын төлөө тэмцэж байгаа. Олон удаагийн эмчилгээ, хагалгаанаас болж эсрэг биет үүссэнээр монголд хагалгаа хийх боломжгүй нөхцөл байдалд орсон. Тиймээс антибоди эсрэг биет шүүх эмчилгээг Солонгос улсад 300 сая  вон бүхий  эмчилгээнийхээ зардалд хувь нэмрээ оруулахаар онлайн лайв тоглолтоо хийхээр болсон. Тэрээр хэлэхдээ “Өнгөрсөн хугацаанд маш олон хэцүү саад бэршээлүүдтэй тулгарч 2008 онд  бөөр орлуулах аппаратанд орж, 2011  онд уушги устаж сэхээнд орсон. Зүрхний калийн хэмжээ ихэссэнээс болж 2012 онд зүрх маань ч зогсож байсан удаатай. Ахин хүн болж буцаж сэргэсэндээ маш их баярлаж явдаг. 2013-2014 онд хоёр нүд маань хараагүй болж хагалгаанд орсон. Мөн 2015 онд хоёр чихний сонсголоо алдан сонсголийн аппарат зүүдэг болж, 2018 онд бүдүүн шулуун гэдэсний хагалгаанд орсон. 2020 онд ходоодны гурван шархтай болж амь нас эрсдэлтэй донорын жагсаалтад хамгийн түрүүнд орж байсан. 2021 онд кдавер донороос бөөр шилжүүлэн суулгах эмчилгээ хийлгэсэн ч ковидын хүнд хэлбэрээс үүдэн гурван сарын хугацаанд суулгасан бөөр маань ажиллахгүй болсон нь үнэхээр харамсалтай байсан. Дараа нь гарын бүх судас ажиллахгүй болж сэхээнд орж одоог хүртэл эмчилгээ хийлгэж байгаа” гэлээ. Түүний хувьд олон жил эмчилгээнийхээ зардлыг өөрөө бүхнийг болгохыг хичээж өдийг хүрсэн ч энэ удаа хандивын тоглолтоо хийхээр шийджээ. Тоглолтод урилгаар Digital  хамтлагийн дуучин Эрка, Ерөөлч Сүхээ, МУСТА Д.Нямжав зэрэг уран бүтээлчид оролцох юм. Мөн Гандан телевиз шууд дамжуулахаар болжээ. Чин сэтгэлээсээ дэмжиж амьдрал бэлэглэхийг хүсэж байгаа хүмүүс 99789176, 99827561 дугаарт холбогдож болно.

Эх сурвалж:www.polit.mn