Т.САЙХАН

2025 оны нэгдүгээр сарын 20-нд шүүхээс эмч П.Батчулууныг хүний эд, эрхтэнийг зөвшөөрөлгүй авсан гэмт хэрэгт гэм буруутайд тооцож, хоёр жил зургаан сарын хорих ял оноосон юм. Уг шийдвэрийг эсэргүүцэн П.Батчулууны ар гэр, өмгөөлөгч нь давж заалдсан бөгөөд түүний гомдлыг 2025 оны гуравдугаар сарын 13-нд Нийслэлийн Эрүүгийн хэргийн давж заалдах шатны шүүх хэлэлцэж, анхан шатны шүүхийн шийдвэрийг хэвээр үлдээсэн юм. Харин өнөөдөр буюу 2025 оны зургадугаар сарын 4-нд Улсын дээд шүүх уг хэргийг хаалттай хянан хэлэлцээд, П.Батчулууныг гэм буруугүй гэж үзэн цагаатгах шийдвэр гаргалаа. Тэрээр Эрүүл мэндийн яамны Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан юм.

Улсын дээд шүүхийн шийдвэрийг уншиж танилцуулснаар хүргэе.

Улсын дээд шүүхийн Танхимын тэргүүн Ч.Хосбаяр: -Өмнөх шатны шүүхүүд хэргийг эрх зүйн талаас нь буруу дүгнэсэн байна. Эрүүгийн хуулийн тусгай ангийн 15.3 дугаар зүйлд хүний цус, эд, эрхтэнийг хууль бусаар авах үйлдэл гэмт хэрэгт тооцогдох бөгөөд амьгүй донорын цогцос мөн адил эрх зүйн хамгаалалтад хамрагддаг. Гэхдээ Зөрчлийн тухай хуулийн 6.10.6-д зааснаар, амьгүй донороос эрхтэн авахдаа нас барагчийн гэрээслэл, эсвэл түүний төрсөн эцэг эх, гэр бүлийн насанд хүрсэн гишүүний зөвшөөрөл байхгүй тохиолдолд энэ нь эрүүгийн гэмт хэргийн бус, зөрчлийн шинжтэй үйлдэл гэж үздэг.

Энэ хоёрын гол ялгаа нь гэмт хэрэгт сэдэл байх шаардлагатайд оршино. Өөрөөр хэлбэл, хууран мэхлэх, заналхийлэх, хүч хэрэглэх зэрэг гэмт хэргийн сэдэл, зорилго байх ёстой. Харин П.Батчулууны хувьд дээрх шинжүүд огт илрээгүй бөгөөд хувийн ашиг хонжоо эрэлхийлээгүй, гэмт хэрэг үйлдэх сэдэлгүй байсан нь тогтоогдсон.

Иймд Улсын дээд шүүх түүний үйлдлийг гэмт хэргийн бүрэлдэхүүнгүй гэж үзэн цагаатгасан юм. Гэвч Зөрчлийн тухай хуулийн 6.10.5-д зааснаар, зөрчил гаргасан этгээд учруулсан хохирлыг бүрэн төлж барагдуулах үүрэгтэй. Харин П.Батчулуун эмч өөрийн сэтгэл санааны хохирлын нөхөн төлбөр зэрэг асуудлыг иргэний эрх зүйн журмаар шийдвэрлэх боломжтой гэжээ. 

Эх сурвалж:www.polit.mn