Ө.САРУУЛ

Зуны урин дулаан цаг айлчлан ирж, хүүхдүүдийн хүсэн хүлээсэн амралт албан ёсоор эхэллээ. Харин амралт гэдэг зүгээр л зугаацах бус, оюунаа баяжуулах, шинэ зүйлсийг танин мэдэх гайхалтай боломж гэдгийг бид мартаж болохгүй. Энэ цаг үед хүүхдэд ном хамгийн сайн анд, хамгийн үнэтэй багш байж чадах билээ. Иймд бага ангийн сурагчдынхаа зуны амралтад зориулан нас, сэтгэхүйд нь тохирсон дараах таван номыг санал болгож байна. Үүнд:

“Монгол ардын шилмэл үлгэр”

Энэхүү номд эртний Монгол ардын баатарлаг, сургамжит, авхаалж самбааг хөгжүүлэх 56 үлгэр багтжээ. Үндэсний бахархал, эцэг эхээ дээдлэх, эх орноо хайрлах үзлийг үлгэрээр дамжуулан хүүхдийн сэтгэлд суулгах гайхалтай бүтээл бөгөөд бага ангийн сурагчдад нэн тохиромжтой.

“Хүүхэд багачуудад зориулсан шинжлэх ухааны туршилтууд”

Энэхүү ном нь 5-10 насны хүүхдүүдэд жинхэнэ эрдэмтэн шиг бодож сэтгэж, туршилтын цаад учир шалтгааныг ойлгуулах зорилготой. Шинжлэх ухаан, технологи, инженерчлэл, дүрслэх урлаг, математикийн салбарт хамаарах 100 гаруй туршилттай энэ ном бяцхан эрдэмтдэд шинжлэх ухаанч таамаглал дэвшүүлж, түүнийг шалгах боломж олгоно.

“Diary of a wimpy kid”

Энэхүү ном нь Грег Хэффли нэртэй дунд сургуулийн сурагч хүүгийн амьдрал, сургуулийн өдөр тутмын хөгтэй, төвөгтэй үйл явдлуудыг өөрийнх нь бичсэн өдрийн тэмдэглэл хэлбэрээр өгүүлдэг. 8-12 насны хүүхдэд хамгийн тохиромжтой бөгөөд англи хэл дээр унших боломжтой.

“Тэрслүү охидод зориулсан бяцхан түүхүүд”

Энэхүү ном нь дэлхий даяар олон сая охидын урам зориг, хүч итгэлийг бадраасан онцгой цуврал ном бөгөөд 6-12 насны охид уншихад тохиромжтой.

“Нохой-хүн” цуврал ном.

Энэхүү ном нь Internom номын дэлгүүрийн бестселлер ном бөгөөд 6-12 насны хүүхэд уншихад тохиромжтой. Цуврал хэлбэртэй тул хүүхэд үргэлжлүүлэн унших сонирхолтой юм. Зуны амралт бол амрахын хажуугаар хөгжих цаг! Эцэг эхчүүд та бүхэн хүүхдэдээ зөв номыг сонгон уншуулах нь тэдний сэтгэн бодох, төсөөлөн туурвих, хэл яриа хөгжих зэрэг олон чадварыг төлөвшүүлэхэд туслах гол түлхүүр юм. Иймд энэ зун хүүхдийнхээ оюун ухааныг хөгжүүлэхэд та бүхнийг уриалж байна.

Эх сурвалж:www.polit.mn