С.УРТНАСАН
2025 оны зургаадугаар сарын 2-ны шөнө 00:27 цагт Улаанбаатар хотын Хан-Уул дүүргийн гуравдугаар хороонд байрлах Дулааны гуравдугаар цахилгаан станцад Өндөр даралтын турбины цехэд гал гарсан байна. Дуудлагын дагуу Нийслэлийн ОБЕГ-ын Гал түймэр унтраах, аврах 10, 14, 18, 26, 30, 63 дугаар ангийн алба хаагчид шуурхай ажиллаж, 01:54 цагт галын тархалтыг зогсоож, 03:21 цагт бүрэн унтраажээ.
Тус станц нь 198 МВт-ын суурилагдсан хүчин чадалтай бөгөөд нэг турбин-генератор ашиглалтаас гарахад л 25 МВт буюу хоёр аймгийн дайтай цахилгаан эрчим хүчний эх үүсвэр тасалддаг байна . Хэрэв бүрэн зогсолт гарвал дараах бүсүүд цахилгаан болон дулааны эрчим хүчний хязгаарлалтад өртөх өндөр эрсдэлтэй. Үүнд: Улаанбаатар хотын баруун бүс – Сонгинохайрхан, Хан-Уул дүүргийн хэсгүүд, Төв аймгийн зарим сум, Булган, Орхон, Дархан-Уул аймаг, Сэлэнгэ аймгийн өмнөд сумд. Мөн үйлдвэрүүд, эмнэлэг, сургууль, айл өрхийн хэрэглээний томоохон хэсгийг гуравдугаар станц хангадаг ба үйл ажиллагаа нь түр зогсвол ОХУ-аас өндөр өртөгтэй эрчим хүч импортлох шаардлага үүсэж магадгүй талаар мэргэжилтнүүд сэрэмжлүүлж байна.
Ослын улмаас нэг иргэн амиа алдсан гэх мэдээлэл гарсан. Энэ талаар ЦЕГ-ын Хэвлэл мэдээллийн төвийн мэргэжилтнээс тодруулахад “Ослын улмаас 53 настай эрэгтэй Х амиа алдсан нь үнэн. Талийгаач “ДЦС-3” ТӨХК-ийн ажилтан байсан эсэх нь тодорхойгүй байна” гэлээ.Одоогоор гал түймрийн шалтгаан болон учирсан хохирлын талаар дэлгэрэнгүй мэдээлэл гараагүй байгаа бөгөөд холбогдох байгууллагууд нөхцөл байдлыг шалгаж байна. Цахилгаан станцын үйл ажиллагаанд ямар нэгэн саатал үүссэн эсэх талаар албан ёсны мэдээлэл хараахан нийтлэгдээгүй байгаа ба цаашдын мэдээллийг Онцгой байдлын ерөнхий газар болон холбогдох хэвлэл мэдээллийн хэрэгслүүдээр дамжуулан авах боломжтой.
Эх сурвалж: zms.mn