Т.САЙХАН
МАН-ын VI Бага хурал болж, Ерөнхий сайд Л.Оюун-Эрдэнийн улс төрийн илтгэлийг хэлэлцлээ. Хэлэлцсэн асуудалтай холбогдуулан МАН-ын Бага хурлын 40 гаруй гишүүн байр сууриа илэрхийлж, УИХ-ын дарга, Ерөнхий сайд, МАН-ын дарга, МАН-ын Ерөнхий бичгийн дарга нараас асуулт асууж, үүсээд буй асуудлыг олон талаас нь хэлэлцээд Хамтарсан Засгийн газрын үйл ажиллагаанд улс төрийн дүгнэлт үзүүлэх тухай тогтоолыг баталжээ.
Хамтарсан Засгийн газрын үйл ажиллагаанд улс төрийн дүгнэлт хийгээд Засгийн газрын бүрэлдэхүүнд ажиллаж байгаа улс төрийн намын УИХ дахь бүлгийн нэр бүхий гишүүдийн Засгийн газарт хамтарч ажиллах гэрээг зөрчсөн үйлдлийг удаа дараагийн үйлдлүүд болон МАН-ын анхан, дунд шатны байгууллагууд, намын гишүүдээс ирсэн санал шүүмжлэлийг үндэслэн МАН-ын VI Бага хурлаас тогтоох нь:
-
МАН Засгийн газарт хамтарч ажиллах гэрээг зөрчсөн улс төрийн намыг оролцуулахгүйгээр Засгийн газрыг бүрдүүлж, 2024 оны УИХ-ын ээлжит сонгуульд дэвшүүлсэн Шинэ сэргэлтийн бодлого, Бүсчилсэн хөгжлийн реформын мөрийн хөтөлбөрийг хэрэгжүүлэх нь зүйтэй гэж үзсүгэй.
-
МАН-ын V Бага хурлын 2024 оны долдугаар сарын 5 өдрийн 04 тоот тогтоолыг хүчингүйд тооцсугай гэжээ.
МАН-ын Төв байгууллага болох Бага хурал олонхоороо шийдвэр гаргасан учраас өнөөдөр Хамтарсан Засгийн газарт орж ажиллаж байгаа АН, ХҮН намын удирдлагуудад уг тогтоолыг таницлуулж, Хамтарсан Засгийн газрын гэрээнд заасны дагуу Бодлогын зөвлөлд дээр асуудлыг хэлэлцээд дараа дараагийн алхмууд хийгдэх аж. Гэрээнд заасны дагуу гэрээгээ зөрчсөн улс төрийн намтай Засгийн газар цаашид хамтарч ажиллахгүй юм байна.
Тэгэхээр гэрээ зөрчсөн гэдэг үндэслэлээр АН-ыг засгаас гаргаж, УИХ-д суудалтай ИЗНН, Үндэсний эвсэлтэй хамтрах асуудал хөндөгдөж магадгүй байна.
Эх сурвалж:www.polit.mn
0