Т.САЙХАН

Хууль зүй, дотоод хэргийн сайд О.Алтангэрэл Ерөнхий сайдыг огцруулахтай холбоотой асуудлаар байр сууриа илэрхийлжээ. Тэрээр "Ерөнхий сайдтай холбоотой асуудлыг хуулийн байгууллага шалгах ёстой. Хэрэв хуулийн хүрээнд зөрчил гарсан гэж үзвэл холбогдох хариуцлагыг тооцох боломжтой. Шалгалт, мөрдөн байцаалтын ажиллагааг гүйцэтгэх байгууллагууд бие даасан байдлаар ажилладаг. Хууль зүй, дотоод хэргийн сайд ийм төрлийн ажиллагаа явуулдаггүйг. Ерөнхий сайд ч гэсэн шалгуулахад бэлэн, ард түмнээсээ уучлал хүсэж байгаа юм байна. Ялаа гэж энэ асуудалд саад болж буй болон улс төрийн үйл явцын ард байгаа хэсэг бүлэг этгээдүүдийн тухай дурдсан гэж ойлгож байна. Тухайн нэр бүхий этгээдүүд хэн болохыг мэдэхийг хүсвэл энэ талаар мэдэгдэл хийсэн хүнээс нь асуух нь зүйтэй. Манай нам дотор асуудлыг нээлттэй хэлэлцдэг. Засгийн газраас гарах ёстой гэсэн байр суурьтай гишүүд бий. Мөн хамтран ажиллах ёстой гэж үзэж буй гишүүд ч байна. Намын асуудлыг намын дүрмийн дагуу шийдвэрлэдэг байгууллагууд болох Үндэсний бодлогын хороо, Их хурлаар хэлэлцэж шийднэ.  Засгийн газарт орсон цагаас хойш 2024–2028 оны үйл ажиллагааны төлөвлөгөөг УИХ-аар батлуулсан. АН-ын Үндэсний бодлогын хорооны шийдвэрийн дагуу хамтран ажиллаж байна. Бид хүний эрхийг хамгаалах чиглэлээр 10 гаруй хуулийн төслийг өргөн барьсан бөгөөд нэмэлтээр оруулах 10 гаруй хуулийн төсөл ч бэлэн болсон. Ард түмэндээ амласан гол зорилтуудын нэг болох хууль бус хөрөнгийг хураах хуулийн төслийг яаралтай батлуулах сонирхолтой байна" гэв.

Эх сурвалж:www.polit.mn