Т.САЙХАН
УИХ-ын чуулганы нэгдсэн хуралдаанаар Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг дэмжилгүй Засгийн газарт буцаасан. Гурил, улаанбуудай импортын татварыг сэргээх агуулгатай дээрх хуулийн төслөөр гурван удаа санал хураалт явуулсан ч олонхын дэмжлэг авсангүй уналаа. Үүнтэй холбогдуулан Хүнс хөдөө аж ахуй, хөнгөн үйлдвэрийн сайд Ж.Энхбаяр байр сууриа илэрхийлсэн юм. Тэрээр "Хаврын тариалалт ид явж байгаа үед Монгол Улсад улаанбуудай шаардлагагүй, дотооддоо гурил үйлдвэрлэх шаардлагагүй, импортоор хангана гэдэг бодлогыг УИХ баталж байна. Улаанбуудайн тариалалт байх нь мал тэжээлтэй, ган зудын эрсдлээс ангижирч байна гэсэн үг. Газар тариалан хөгжих нь хүнсний үйлдвэрүүд хөгжихийн нэр. Гахай, тахиа, сүүний зэрэг олон эрчимжсэн аж ахуй бий болно. Энэ бодлогыг дэмжиж Засгийн газар "Атрын IV" аян зарлаж улам бүр эрчимжүүлэх зорилго тавьж буй энэ цаг үед газар тариалангийн суурь болсон үндсэн таримал болсон улаанбуудайн тарималыг тариулахгүй байх бодлогыг Их хурал баталлаа. Энэ бол Үндэсний эрх ашигаас урвасан үйлдэл" гэлээ.
Эх сурвалж:www.polit.mn