Т.САЙХАН

Ерөнхий сайд Л.Оюун-Эрдэнийг орлогоо нотлохыг шаардсан жагсаал өнөөдөр /05.15/ хоёр дахь өдрөө үргэлжилж байна.  Энэ асуудлаар Шадар сайд Т.Доржханд тайлбар мэдээлэл өглөө.  Тэрээр "ХҮН нам хамтарсан Засгийн газрын нэг бүрэлдэхүүн хэсэг. АН мөн ялгаагүй хамтарсан Засгийн газрын нэг бүрэлдэхүүн хэсэг. МАН ч ялгаагүй. Энэ гурван нам нийлээд тулгамдсан асуудлуудыг хамтдаа шийдэцгээе, эр зориг гаргацгаая гэж байгаащ. Одоо бол иргэдийн улс төрийн мэдлэг муу байна. АН, ХҮН нам сөрөг хүчин байх ёстой гээд. Бид одоо тэс өөр эрх зүйн тогтолцоонд орсон. 1990 онд АНУ-ын хоёр намын системийг хуулаад шулуухан хэлэхэд улсаараа популизмд орж, нэг нь эрх барьдаг, нөгөөх нь сөрөг хүчин гэж явсаар байгаад том төслүүдээ ч хэрэгжүүлж чадахгүй, нэг нэгэндээ дэгээ тавьж ирсэн.  75 жил гэдэг бол маш харамсалтай. Социализмын үед хийж чадаагүй, 1990-ээд оноос хойш ч хийж чадаагүй. Үр дүнд 60 тэрбумын орлогоо алдсан. Энэ бол бага тоо биш маш их хэмжээний алдагдал. Гэтэл энэ том ажил руу анхаарах биш өөр хов живээр амьсгалж байгаа нь харамсалтай байна. Т.Доржханд гэдэг хүн худал хэлж, хулгай хийх гэж Засгийн газарт ороогүй. Эрх мэдэл байхгүй шүү дээ. Шулуухан хэлэхэд эрх мэдэл байхгүй. Монгол Улс ардчилсан орон мөн ч гэсэн иргэд ингэж болохгүй.Орлогоо нотло гэдэг зүйл ардчилсан улсад байх зүйл. Гэхдээ өнөөдөр Монгол Улсад асар том эдийн засгийн асуудал яригдаж байхад ийм зүйл хийж, хов жив хөөх нь зохисгүй. Энэ бол саармагжуулах үйл явц. Маш буруу. Бидэнд эрх ашгийн эрэмбэ чухал. Мега төслүүд хэрэгжих болохоор л эсэргүүцэгчид гараад ирдэг. Хил холболт, мега төслүүд хэрэгжих гэхээр л орлогоо нотло зэрэг хов жив гарч ирэх тохиолдол нь өөрөө сонин байна. Том төслүүд яригдахаар л Засгийн газар огцор гэдэг. Л.Оюун-Эрдэнэ хулгай хийж, худал ярих хүн биш. Том төслүүд хөдөлж, бүтээн байгуулалт эхлэх үеэр огцруулах жагсаал болдог нь тохиолдол биш" гэлээ. 

Эх сурвалж:www.polit.mn