Т.САЙХАН
УИХ-ын гишүүн Д.Цогтбаатар Дээд шүүхийн ерөнхий шүүгчид ял хойшлуулах хүсэлт өгсөн ч хуулиар түүний ялыг хойшлуулах боломжгүй гэдгийг тайлбарласан. Нөгөө талдаа ШШГЕГ-т Д.Цогтбаатартай холбоотой шүүхийн тогтоол очоогүй гэдгийг дарга бас хэлсэн юм. Гурван шатны шүүхээр гэм буруутай нь тогтоогдсон УИХ-ын гишүүний бүрэн эрхийг хэрхэн түдгэлзүүлэх нарийн зохицуулалт байхгүй учраас өнөөдрийг хүртэл УИХ шүүхийн шийдвэрийг хэрэгжүүлэхгүй байгаа гэдгийг холбогдох байнгын хорооны дарга нар мэдээлсэн. Тиймээс цаашид ямар арга хэмжээ авч, шүүхийн шийдвэрийг хэрэгжүүлэх талаар Төрийн байгуулалтын байнгын хорооны дарга Ж.Бат-Эрдэнэ мэдээлэл өгчээ. Тэрээр "Төрийн байгуулалтын байнгын хорооноос Улсын дээд шүүх рүү "мэдээллийг хүргүүлнэ үү" гэх албан бичгийг явуулсан. Хариуг ирүүлсэн. 64 хуудас бүхий тогтоолыг явуулсантай танилцлаа. Одоо яг юунд үндэслэн чуулганы хуралдаан руу эл асуудлыг оруулах вэ. Хуульд үүнийг тодорхой зааж өгөөгүй. Тэгэхээр Дэгийн тухай хуульдаа өөрчлөлт оруулах шаардлагатай байна. Шүүхийн шийдвэр заавал биелнэ гэж байгаа шүү дээ. Тэгэхээр Үндсэн хуулийнхаа заалтыг бариад Дэгийн тухай хуульд өөрчлөлт оруулахаас өөр аргагүй. Төрийн байгуулалтын байнгын хороонд уг асуудлыг танилцуулж, гишүүд асуулт асууж, хариулт авах байдлаар танилцана гэж хуульд өөрчлөлт оруулах ёстой гэж харж байна. Энэ талаар УИХ-ын Тамгын газар болон хуульчидтайгаа ярилцана" гэсэн юм.
Эх сурвалж: www.polit.mn