Т.САЙХАН
Баялгийн сангийн хуультай холбоотойгоор Стратегийн ордуудын асуудал дахин хөндөгдөж эхэлсэн билээ. Тэгвэл Засгийн газраас байгуулсан ажлын хэсгийн ахлагчийн хувьд ЗГХЭГ-ын дарга Н.Учрал энэ долоо хоногт нэгэн мэдэгдэл хийсэн нь анхаарал татаж байна. Тэрээр "Би УИХ-ын гишүүн, Монгол Улсын төрийн тэргүүнээр ажиллаж байсан Х.Баттулга гуайд хандаж хэлье. Та 39 стратегийн ордод хамаардаг Төгрөг нуурыг ордыг зарсан чинь үнэн. Зарах зарахдаа Виржини арал, Сингапур, Хонгконгод бүртгэлтэй компаниудаар дамжуулж, үндэстэн дамнасан санхүүгийн схем хийж, 250 сая ам.доллароор зарсан чинь үнэн. Та Монгол Улсын Ерөнхийлөгчөөр ажиллаж байсан чинь ч үнэн. Та баялгийг иргэдэд өгье, байгалийн баялагтаа эзэн болъё гэж ярьж яваа чинь үнэн. Тийм учраас би Баялгийн сангийн ажлын хэсгийн ахлагчийн хувиар та энэ олон компаниудтайгаа өөрөө учир, холбогдлоо олж, асуудлыг шийд гэдэг долоо хоногийн хугацаа өгч байна. Хэрэв шийдэхгүй бол Засгийн газар хуулийн хүрээнд дараагийн арга хэмжээг авна гэдгээ хэлье" гэлээ. Энэ мэдэгдлийн дараагаас Төгрөг нуурын орд болон Ерөнхийлөгч асан Х.Баттулгатай холбоотой олон асуудал өрнөөд байна. Х.Баттулгын талаар ноцтой юм ярьж байсан хүн ганцхан Н.Учрал биш. Хотын дарга Х.Нямбаатарт нэгэн мэдээллийг олон нийтэд хүргэж байсан. Тэрээр "Х.Баттулгад хийгээгүй хулгай, идээгүй зүйл гэж байхгүй. Тэр хулгайгаа халхлахын тулд өөрсдийнхөө суганы үснүүдийг энд тэнд дэвшүүлж УИХ-ын гишүүн, НИТХ-ын төлөөлөгч болгож байна. Тэр ингэж хойч үеэ бэлддэг уламжлалтай болчихсон. НИТХ-д гэхэд төрсөн эгч дүүгээ, тэдний хүүхдүүдийг, өөрийн компанийн захирлуудыг, туслах жолооч нараа, хэвлэлийн хар бараан мэдээ хийдэг хүмүүсээ бүгдийг нь дэвшүүлсэн" гэжээ.
Эх сурвалж:www.polit.mn