Т.САЙХАН

УИХ-ын Хууль зүйн байнгын хорооны өчигдрийн /04.01/ хуралдаан дээр УИХ-ын гишүүн Б.Энхбаяр сейфнээс нь 7.5 тэрбум төгрөг гарч ирж, шүүхээс ял сонссон Улаанбаатар төмөр замын Тээвэр зохицуулалтын албаны орлогч дарга асан С.Батдөлийг Шүүхийн шийдвэр гүйцэтгэлийн ерөнхий газрын харьяа амралтын газарт ял эдлүүлж байгаа хүн нь Монгол Улсын мөнгийг мэддэг сайд. АТГ жинхэнэ эзнийг нь олж шийтгээрэй” гэж хэлсэн юм. 

Тэгвэл эл асуудалд Сангийн сайд Б.Жавхлан хариу тайлбар хийлээ. Тэрээр “Б.Энхбаяртай Засгийн газарт хамт ажиллаж байсан. Засгийн газарт ажиллахын жаргал, зовлонг маш сайн мэддэг хүн. Өөрөө энэ салбарын хүн, иймэрхүү юм ярьж байгаа нь маш харамсалтай.  Юунд ингээд хорсоод яваад байдаг юм, мэдэхгүй. Би гайхаж байна. Сэдэв болгон дээр ингэж орж ирж над руу дайрдаг. Би бол нэлээн хүлээцтэй, тэвчээртэй харж байгаа. Хүний тэвчээрт хязгаар байгаа шүү.  Өөрөө төсвийн ерөнхийлөн захирагч байсан хүн. Өөрийнх нь харьяа байгууллагынх нь төсвийг ярьж байх шиг байна. Харьяа байгууллагынх нь төсөв нэмэгдээд үйл ажиллагаа нь сайжирч байвал сайн. Тэр залуу Дарханы залуу. Дарханд төрж өссөн. Аав ээж нь манай намын ахмад гишүүн. Хүүхдүүдээ захиж байсан талууд байгаа. Тэр асуудалтай холбож, намайг буруутгаж, хар буруу юм наах гэж байгаа бол ёстой амжихгүй шүү. Шүүхийн шийдвэр гүйцэтгэлийн ерөнхий газар/ШШГЕГ/  бол бие даасан байгууллага. Тэр хүн хаана хуулийнхаа дагуу ялаа эдлээд байж байгааг огт мэдэж байгаа юм алга. Тэр асуудалд санаа тавьж явах зав зай ч алга. Сангийн сайд ийм юманд оролцдог юм уу гээд ШШГЕГ-аас асуучих хэрэгтэй. Хуулийн байгууллага нь шалгаад тогтоогоод тэр залуу ялаа эдлээд явж байгаа гэж ойлгосон. Дарханых л бол сайн ч бай муу ч бай, наах гэж оролддог. Ер нь мууг нь л надтай холбодог. Ийм өнцгөөр явчихсан юм болов уу л гэж харж байна. Тэр залуутай огтын холбоо сүлбээ байхгүй гэдгийг онцолж хэлье. Шүүхэд хандах эсэх тухайд Б.Энхбаяр гишүүнийг өөрийг нь харъя, нотлох хэрэгтэй. Юунд хорсоод гүйгээд байгаа юм бүү мэд” гэв.

Эх сурвалж:www.polit.mn