Т.САЙХАН

УИХ-ын чуулганы нэгдсэн хуралдаан үргэлжилж байна. УИХ дахь намын бүлгүүд, ХЗБХ хэлэлцэж дэмжсэн АТГ-ын дарга З.Дашдавааг улираан томилох асуудлыг хэлэлцэж байгаа юм.

УИХ-ын гишүүн С.Эрдэнэболд: -Сая хоёрдугаар сарын 3, 4-нд утааны сонсгол болсон. Анзаарч байхад хүмүүс дулаан цаг ирэнгүүт энэ асуудлыг мартчхаж байгаа юм. Өнгөрсөн 10 жилийн хугацаанд 1.8 их наяд төгрөгийн зардлыг утааг бууруулахад зарцуулсан байгаа юм. Энд 190 гаруй тэрбум төгрөгийн зөрчил одоогийн байдлаар мэдэгдсэн гэж үзэж буй. Монгол хүний эрүүл, аюулгүй орчинд амьдрах эрхийг ноцтойгоор зөрчиж байгаа энэ асуудлыг далайцтай шийдэж чадахгүй байгаагийн цаад нууц нь энд мөнгө угаалт явагддаг байж болзошгүй нөхцөл байдал, дээр нь янз бүрийн төсөл хөтөлбөрөөр татвар төлөгчдийн мөнгийг завшдаг байж болзошгүй байгаа юм. Уг асуудалд хэрхэн анхаарч ажиллаж байгаа вэ.

АТГ-ын дарга З.Дашдаваа: -Миний хувьд ирэх зургаан жилд хийх ажлын концепц бол хүнтэй тэмцэхээс илүү тогтолцоо руугаа анхааръя гэж бодож байгаа. Өнөөдөр хуулиас давсан журмууд гаргаад хүнд суртал үүсгэдэг. Хуулиас давсан шийдвэрүүд гаргаад төрийн албан тушаалтан аливаа асуудлыг хүндрүүлдэг асуудлыг УИХ, ЗГ-тай хамтарч ажиллана гэж бодож байгаа. Эхний ээлжид журмуудыг цэгцлэх чиглэлд тодорхой ажлууд хийгээд явж байгаа. Олон нийтээс ч шүүмжилж байгаа нэг асуудал нь та нар акулуудтайгаа тэмцэж чадахгүй жижиг загаснуудаа бариад байна гэдэг. Цаашид үйл ажиллагаагаа сайжруулж ажиллана гэж зорьж байна гэлээ. 

Эх сурвалж:www.polit.mn