Т.САЙХАН
Засгийн газрын хуралдаанаас гаргасан шийдвэрийг ЗГХЭГ-ын дарга Н.Учрал танилцууллаа. Тэрээр "Үндэсний баялгийн сангийн хуулийг хэрэгжүүлэх хүрээнд Аж үйлдвэр, эрдэс баялгийн яамнаас стратегийн 16 ордын хил хязгаарыг тогтоох асуудлыг танилцуулсан. Мөн 2007 оны тогтоол дээр байсан 39 стратегийн ордуудын төслийг өргөн барихаар шийдвэрлээд, бэлдэж байна. Ингэснээр стратегийн 16 ордыг 39-өөр нэмэгдүүлж нийт 55 стратегийн ордыг УИХ-д өргөн мэдүүлэхээр бэлтгэж байгаа. Монголын ард түмэн 55 орд дээр Тавантолгойн ногдол ашиг шиг ашиг хүртвэл ямар хэмжээний ашиг хүртэх вэ гэдэг нь ойлгомжтой.
Монголын ард түмний 26.3 хувь нь 1072 хувьцааг эзэмшдэг. Уадхгүй хувь хүний орлогын албан татвар хассан дүнгээр үлдэгдэл 93500 төгрөг иргэдэд тараагдахаар байгааг Эрдэнэс Тавантолгой компанийн удирдлагууд Засгийн газарт мэдээлж байна. Энэ жил Баялгийн сан дахь таны хадгаламж төрийн өмчит уул уурхайн компаниудын 34 хувь шилжсэнээр нэмэгдэнэ. Стратегийн 39 орд дотор Төгрөг нуурын орд хамаардаг. Энэ ордыг 1983 оноос хойш хайгуулыг нь хийгээд нөөцийг тодорхойлсон. Тодруулбал, 3.1 тэрбум тонны нөөц байна гэдэг судалгаанууд гарсан байдаг. Миний УИХ-ын чуулган дээр яриад байгаа зүйл үнэн. Энэ орд дээр Төгрөг Энержи компани 4 лиценз эзэмшдэг. Би УИХ-ын гишүүн, Монгол Улсын төрийн тэргүүнээр ажиллаж байсан Х.Баттулга гуайд хандаж хэлье. Та 39 стратегийн ордод хамаардаг Төгрөг нуурыг ордыг зарсан чинь үнэн. Зарах зарахдаа Виржини арал, Сингапур, Хонгконгод бүртгэлтэй компаниудаар дамжуулж, үндэстэн дамнасан санхүүгийн схем хийж, 250 сая ам.доллароор зарсан чинь үнэн. Та Монгол Улсын Ерөнхийлөгчөөр ажиллаж байсан чинь ч үнэн. Та баялгийг иргэдэд өгье, байгалийн баялагтаа эзэн болъё гэж ярьж яваа чинь үнэн. Тийм учраас би Баялгийн сангийн ажлын хэсгийн ахлагчийн хувиар та энэ олон компаниудтайгаа өөрөө учир, холбогдлоо олж, асуудлыг шийд гэдэг 7 хоногийн хугацаа өгч байна. Хэрэв шийдэхгүй бол Засгийн газар хуулийн хүрээнд дараагийн арга хэмжээг авна гэдгээ хэлье" гэлээ.
Эх сурвалж:www.polit.mn