С.УРТНАСАН

Боловсрол, шинжлэх ухааны яамны харьяа “Инженер, технологийн дээд боловсрол” төсөл 2014 оноос эхлэн 12 дахь жил дээ үйл ажиллагаагаа явуулж байна. Монгол Улсад мэдлэг чадвар сайтай инженер, технологийн мэргэжилтэн бэлтгэх боловсон хүчний нөөцийг бэхжүүлж, сургалтын орчин чанарыг шинэчлэн  сайжруулах зорилгоор үйл ажиллагаагаа явуулдаг. Энэ зорилгын хүрээнд нийт 1000 оюутан, багш, судлаачийг Япон Улсад суралцуулахаар төлөвлөсөн бөгөөд одоогийн байдлаар бакалаврын хамтарсан хөтөлбөрөөр 292, коосэн хөтөлбөрөөр 177, магистр 37, доктор 104, зэргийн бус богино хугацааны сургалтаар 488 гээд нийт 1098 оюутан, багш, судлаачид хамрагдсанаас 1035 нь суралцан төгсөж, эх орондоо амжилттай ажиллаж байна.

Энэхүү төслийн нэг хэсэг болох “Хамтарсан судалгаа” хөтөлбөрийн хүрээнд МУИС, ШУТИС, ХААИС-ийн хамтарсан судалгааны 26 баг Япон улсын 60 гаруй их сургууль, судалгааны хүрээлэнтэй хамтран ажиллаж дээрх гурван их сургуулийн сургалт судалгааны орчин нөхцлийг сайжруулахаар лабораторийн тоног төхөөрөмж нийлүүлэх ажлыг үе шаттайгаар зохион байгуулжээ. Түүнээс дурдвал 16.9 сая ам.долларын 686 нэр төрлийн 3629 ширхэг олон улсын түвшинд нийцсэн тоног төхөөрөмжийг суурилуулсан гэнэ.

12 жилийн хугацаанд Монгол Улсад Япон Улсын их сургууль, эрдэм шинжилгээний хүрээлэнгээс 370-аад зочин судлаач ирж бакалаврын хөтөлбөр шинэчлэлт, хамтарсан судалгаа, эрдэм шинжилгээний ажилд оролцон, олон улсын түвшинд хүлээн зөвшөөрөгдсөн эрдэм шинжилгээний сэтгүүлүүдэд 339 өгүүлэл хэвлүүлж, нэлээд олон патент бүртгүүлэх, ашигтай загварын гэрчилгээ авах эрхтэй болж, төслийн хүрээнд гарааны таван компани байгуулагдан үйл ажиллагаагаа явуулж байна.

Харин 2025 оны гуравдугаар сарын 28-ны өдөр сүүлийн 12 төгсөгчид эх орондоо ирлээ. Энэ удаагийн Япон Улсын “Эзэн хаан”-ы гэж нэрлэгдэх шилдэг их сургуулиудад орон нутгаас сонгогдон бэлтгэгдсэн сурагчид яваад ирж байгаагаараа онцлогтой. Тэдний долоо нь механик инженер, үлдсэн нь архитектур болон БХО инженерийн боловсролыг Японы Нагаоки, Тоёохаши, Нагояа, Кюүшюү, Киото, Күмамото зэрэг сургуулиудад эзэмшээд ирж буй. Мөн Магистрын зэрэгт дэвшин дөрвөн жилийн хугацаанд суралцсан Б.Шагдарын мэдлэг чадвар бусдыгаа манлайлсан чадварыг төслийг хэрэгжүүлэгчид болон Японы тал сайшаан магтаж байсан юм.

Эх сурвалж: “Зууны мэдээ” сонин

2025 ОНЫ ГУРАВДУГААР САРЫН 31. ДАВАА ГАРАГ. № 58 (7555)