Т.САЙХАН

Төв аймгийн цагдаагийн газарт өчигдөр /03.11/ оройн 19.00 цагийн орчимд "Өндөрширээт сумын нутаг дэвсгэрт автомашинууд мөргөлдөж, хүн нас барсан байна" гэх харамсалтай дуудлага мэдээлэл бүртгэгдсэн байна. Энэ талаар цагдаагийн байгууллагаас тодруулахад "Авто ослын дуудлага бүртггэгдсэн. Шалгалтын ажиллагааг хийж байна" гэв. Урьдчилсан байдлаар Төв аймгийн Өндөрширээт сумын нутаг дэвсгэрт орших Талын уул гэх газар буюу Улаанбаатар-Арвайхээр чиглэлийн авто замын 170 дахь км орчимд “Toyota Hiace” маркийн автомашины жолооч нь Улаанбаатар хотоос Завхан аймгийн чиглэлд зорчиж явсан “Kia Grandbird” маркийн том оврын автобустай мөргөлдсөн осол болсон байдаг.

Ослын улмаас “Toyota Hiace” маркийн автомашинд зорчиж явсан таван хүн, жолоочийн хамт нийт зургаан хүн нас барж, хоёр хүүхэд гэмтсэн ослыг Төв аймгийн цагдаагийн газар шалгаж байгааг албаныхан мэдээллээ. Ослоор нас барсан зургаан хүний хоёр нь хүүхэд байжээ.

Эх сурвалж:www.polit.mn