Т.САЙХАН

Халдварт өвчин судлалын үндэсний төвөөс /03.07/ цаг үеийн асуудлаар мэдээлэл хийлээ. Өнөөдрийн байдлаар улаанбурхан өвчний батлагдсан найман тохиолдол байна. Эдгээр найман тохиолдлыг насны ангиллаар нь авч үзвэл 5 сартайгаас 38 насны хүмүүс байна. Нийт батлагдсан тохиолдлын гурав нь вакцин хийлгэх насанд хүрээгүй буюу есөн сар хүрээгүй хүүхдүүд байна. Мөн вакцинд хамрагдаагүй 5-14 насны 3 хүүхэд, нэг том хүн байна гэлээ. 

Зүүн Азийн орноор аялсан таван тохиолдол байна. Өөрөөр хэлбэл, аялах хугацаандаа улаанбурхан өвчний халдварыг авсан. Монголд ирсэн хойноо оношлогдсон. Тиймээс эцэг эхчүүд хүүхдүүдээ товлолт вакцинд нь хамрагдсан эсэхийг нягтлаад хэрэв хамрагдаагүй, ямар нэгэн шалтгаанаар вакцинаас хоцорсон бол товлолын дагуу вакцинд хамруулаарай. Ингэснээр улаанбурхан өвчнөөс сэргийлэх бүрэн боломжтой. Улаанбурхан өвчний тархалтад бага насныхан өртөх эрсдэл өндөр байгаа тул эмнэлэг болон олон нийтийн газраар хүүхдээ дагуулж явахгүй байхыг анхааруулж байна. Зайлшгүй шаардлагатай тохиолдолд хүүхэдтэйгээ эмнэлэг орохоор бол халдвар хамгааллын дэглэм сахиж, гарыг нь ариутгаж амны хаалт зүүх хэрэгтэй гэлээ. 

Эх сурвалж:www.polit.mn