Т.САЙХАН

Гадаад харилцааны сайд Б.Батцэцэг хоёрдугаар сарын 28-аас гуравдугаар сарын 5-ны хооронд Япон улсад айлчлал хийсэн. Тус айлчлалаар хэд хэдэн зээлийн хэлэлцээр болон буцалтгүй тусламжийн нот бичигт гарын үсэг зурсан байна. Тухайлбал, Япон Улсын Засгийн газрын буцалтгүй тусламжаар хэрэгжих “Бохир усны шугам сүлжээний засвар үйлчилгээний машин механизм, тоног төхөөрөмж нийлүүлэх төсөл” болон “Агаарын бохирдол хэмжих төхөөрөмж нийлүүлэх төсөл”-ийн солилцох ноот бичигт гарын үсэг зуржээ. Эдгээр төслүүдийн хүрээнд Япон Улсаас манай улсад 270 сая иений үнийн дүн бүхий ус зайлуулах шугам, хоолойг цэвэрлэх, үзлэг хийх ажлыг сайжруулах тоног төхөөрөмж, 275 сая иений үнийн дүн бүхий агаарын бохирдлын хэмжилт хийх станцууд, зуух болон боловсруулсан нүүрс, коксын ялгаруулалтын хийг хянах хэмжилтийн тоног төхөөрөмжийг нийлүүлэх юм байна.

Мөн Япон Улсын Засгийн газраас манай улсад Хөгжлийн албан ёсны тусламжийн хүрээний иений хөнгөлөлттэй зээлийг эргэн сэргээхээр шийдвэрлэжээ.

Түүнчлэн манай хоёр улсын найрамдал, нөхөрлөлийн бэлгэ тэмдэг болсон “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэхээр талууд ярилцсан байна. ЖАЙКА-гийн хөнгөлөлттэй зээлийн хөрөнгөөр хэрэгжүүлсэн “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх бөгөөд ЖАЙКА-гийн төлөөлөл манай улсад ирж судалгаа хийх аж. Одоогоор хэдий хэмжээний ямар хугацаатай зээл авч, онгоцны буудлын хүчин чадлыг хэрхэн нэмэгдүүлэх талаар мэдээлэл байхгүй байна. 

Эх сурвалж:www.polit.mn