ШУА-ийн их чуулган болж өнгөрлөө. Энэ удаагийн ээлжит их чуулганаар дараах 4 асуудлыг хэлэлцэн шийдвэрлэв. Үүнд: - “Шинжлэх Ухааны Академийн 2024 оны эрдэм шинжилгээ, үйл ажиллагааны тайлан”-г ШУА-ийн Эрдэмтэн нарийн бичгийн дарга, доктор /Sc.D/ Ш.Ариунаа хэлэлцүүллээ. Академийн гишүүд тус тайланг 100 хувийн саналаар баталлаа. - ШУА-ийн ерөнхийлөгч С.Дэмбэрэл өнгөрсөн 10-р сард ерөнхийлөгчөөр сонгогдсоноосоо хойш хийж зорьж буй ажлынхаа 100 хоногийн тайланг танилцуулав. - Шинжлэх Ухааны Академийн гишүүдийг сонгох сонгууль явуулав. Салбар бага чуулгануудаас сонгогдсон 8 нэр дэвшигчидээс дараах 4 эрдэмтэн сонгогдлоо. Мижидсүрэнгийн БЯМБАСҮРЭН Ургамал хамгааллын эрдэм шинжилгээний хүрээлэнгийн захирал, ХААШУ-ны доктор (Sc.D.), дэд профессор, Дамдины ДАГВАДОРЖ ШУА-ийн Газарзүй, геоэкологийн эрдэм шинжилгээний ажилтан ГЗШУ-ны доктор (Sc.D.), Дашдондогийн ЦЭДЭНБАЯР ШУТИС-ийн Хэрэглээний шинжлэх ухааны сургуулийн профессор, ФМШУ-ны доктор (Sc.D.), профессор Цэгмэдийн ЦЭРЭНДОРЖ ШУА-ийн дэд ерөнхийлөгч ТШУ-ны доктор (Sc.D.), профессор нар ШУА-ийн гишүүдээр сонгогдлоо. Журмын дагуу шинэ соногогдсон гишүүдийг Монгол Улсын Ерөнхийлөгч батламжласнаар Академич цол хэргэм баталгаажих юм. - ШУА-ийн гадаад гишүүнээр: ОХУ-ын Шинжлэх ухааны академийн ерөнхийлөгч Академич КРАСНИКОВ ГЕННАДИЙ ЯКОВЛЕВИЧ, АНУ-ийн Үндэсний насжилт судлалын хүрээлэнгийн дархлаа зохицуулалтын секторын эрхлэгч, доктор БИРААГИЙН АРЪЯА нарыг сонголоо.