С.УРТНАСАН

Нэгдүгээр сарын 23-24-нд шилжих шөнө байшинд байсан нэг гэр бүлийн зургаан иргэн угаартаж нас баржээ. Тодруулбал, тус байшинд насанд хүрсэн хоёр хүн, дөрвөн хүүхдийн хамтаар байжээ. Тухайн гэр бүл 17 насны нэг хүүтэй бөгөөд цэрэгт байх хугацаанд нь энэхүү харамсалтай явдал болсон байна. Цэрэгт явсан хүүг О.Одбаяр гэдэг бөгөөд Сүхбаатар аймгийн цэргийн ангид алба хааж байжээ. Тэрээр “Намайг цэргээс чөлөө аваад бодох санах зүйлгүй гэртээ ороход, дүү минь сэтгэлээ бариарай, ээж, ах дүү нар нь бурхан болчихлоо гэж хэлсэн. Ингээд би ухаан мэдрэлгүй болж, агаар амьсгалж байгаад буцаж гэртээ орон юу болсныг асуусан. Угаартсан гэж хэлсэн” гэв.

О.Одбаяр: “Ээж минь жирийн л нэг компанийн үйлчлэгч хийдэг, биднийг хүний дайтай хүн болгосон хүн байлаа. Дүү нар минь 6-15 насны хүүхдүүд байсан. Ээжээс минь 4-5 насны нэг ах болон түүний охин бас үгүй боллоо. Цэргээс нэр төртэй халагдаж ирээд бага дүүгийнхээ нэгдүгээр ангийн төгсөлтийн баярыг гоё хийж өгнө гээд хүсэж явсан ч ийм зүйл болчихлоо. Намайг мэдүүлэг өгүүлэхгүй гээд байгаа ах эгч хоёрыг минь ажил явдлын үеэр ЦЕГ-аас дуудаж, 2-3 цагийн мэдүүлэг авсан байсан. Ээж дүү нарын минь оршуулгын зардалд улсаас таван сая төгрөг өгсөн. Цэрэгт явчхаад ирэхдээ би гэр бүлээ алдлаа. Дүү нар минь юугаа ч мэдэхгүй байж байгаад өөд болчихлоо шүү дээ. Би гомдолтой байна. Надад туслах өмгөөлөгч, хуульч байвал нээлттэй” гэжээ.

Эх сурвалж: polit.mn