Т.САЙХАН

Нийслэлийн Засаг дарга бөгөөд Улаанбаатар хотын захирагч асан Э.Бат-Үүл өнгөрсөн бямба гарагт Нийслэл Улаанбаатар хотын агаарын бохирдлыг бууруулах, дэд бүтцийн бүтээн байгуулалтын төсөл, арга хэмжээг хэрэгжүүлэхэд дэмжлэг үзүүлэх, салбар хоорондын зохицуулалт, шуурхай удирдлагаар хангах Шуурхай штабын ээлжит хуралдаанд оролцлоо. Тэрээр Шуурхай штабын зөвлөхөөр ажиллахаар болжээ. Үүнийг нь намынх нь зарим нөхөд шүүмжилж байгаа юм.

Тэгвэл Э.Бат-Үүл өөрийн цахим хуудастаа тайлбар хийжээ. Тэрээр "Хотын бүтээн байгуулалтын штаб нь хурдны замаар суурь хийсэн Улаанбаатар хотын шинэ ерөнхий төлөвлөлт рүү шилжиж бгаа юм билээ. Энэ өөрчлөлтөө УИХ-аар оруулах, хэрэгжүүлэх хөрөнгө мөнгөө тодорхой болгох хэрэгтэй гэж би зөвлөсөн. Би Улаанбаатар хотын дарга байсан хүн. Санаа бодлоо хэлэх эрхтэй. Энэ тухайгаа 16 онд ажлаа өгснөөсөө хойш уйгагүй хэлж, бүр “Хотын даргад зөвлөцгөөе” нэртэй контент хүртэл хийж ирсэн. Бас аль нэг намын цахилгаан станц, зам барилга, дахин төлөвлөлт, цэвэрлэх байгууламж, дэд бүтэц гэж байдаггүй юм гэж хэлсээр байтал МАН бидний хийж байсан ажлыг 2016 оноос хойш улстөржүүлэн гацаасан. Би энэ тухай гомдол мэдүүлсээр ирсэн. Харин одоо саналаа хэлээч гэхээр нь хэлж байна. Үүнд юу нь буруу гэж" гэсэн байна.

Сануулахад, Хотын дарга  Х.Нямбаатар 2024 онд "Э.Бат-Үүлийн үед гэр хорооллын дахин төлөвлөлтөөс хохирсон бүх хүнд байр өгнө" гэсэн утгатай мэдэгдэл хийж байв.  Түүний хариуд Э.Бат-Үүл "2016 онд нийслэлд МАН ялаад, хамгийн эхлээд хийсэн ажил нь Гэр хорооллын дахин төлөвлөлтийн ажлыг зогсоож, 1500 орчим айлыг орох оронгүй болгосон! Новширч найман жил болчхоод, одоо намайг гүтгэж сонгуульд орох гэнэ.  Хуцав аа, Нямбаатар аа.  Би илчилнэ ээ" гэж байв. 

Эх сурвалж:www.polit.mn