Т.САЙХАН
УИХ-ын чуулганы нэгдсэн хуралдаан эхэллээ. Хуралдааны эхэнд Засгийн газар болон Бүгд Найрамдах Энэтхэг Улсын Экспорт-Импорт банк хоорондын Зээлийн хэлэлцээр соёрхон батлах тухай хуулийн төслийг эцэслэн баталлаа. Санал хураалтад оролцсон 69 гишүүн буюу 88.7 хувиар дэмжиж, Зээлийн хэлэлцээрийг соёрхон баталлаа.
Газрын тос боловсруулах үйлдвэрийг барьж дуусгахад нэмэлт санхүүжилт шаардлагатай байгаа тул Монгол Улсын Засгийн газар Энэтхэгээс 462.2 сая ам.доллар нэмж авахаар зээлийн хэлэлцээрт тусгасан. Зээлийн нөхцөл нь өмнө байгуулсан хэлэлцээрүүдтэй адил жилийн 1.75 хувийн хүү, үйлчилгээний шимтгэл болон хөрөнгө нөөцлөн баталгаажуулсны шимтгэл тус бүр 0.5 хувь, үндсэн өрийн төлбөрөөс эхний таван жил чөлөөлөгдөх, нийт 20 жилийн хугацаатай байна.
УИХ-аар зээлийн хэлэлцээрийг соёрхон баталснаар Газрын тос боловсруулах үйлдвэрийг барих ажил зогсолтгүй үргэлжилнэ. Засгийн газар бүрэн эрхийнхээ хугацаанд нийт 14 мега төсөл хэрэгжүүлэх зорилт тавьснаас хамгийн тэргүүнд өгөөжөө өгөх төсөл нь энэхүү Газрын тос боловсруулах үйлдвэр байх тухай Сангийн сайд Б.Жавхлан мэдэгдсэн билээ.
Эх сурвалж:www.polit.mn