Т.САЙХАН
УИХ-ын гишүүн Н.Номтойбаяр цаг үеийн асуудлаар мэдээлэл хийлээ. Тэрээр УИХ-ын намрын чуулганаар УИХ-д суудалтай "Үндэсний эвсэл"-ийн дөрвөн гишүүн нийт найман ажлын хэсэгт орж ажиллалаа. Үүнээс гадна бид агаарын бохирдлыг бууруулах хүрээнд тодорхой судалгааны ажлыг хийж, эдийн засгийн чиг баримжаатай, шинжлэх ухааны тооцоолол дээр үндэслэж, богино хугацаанд агаарын бохирдлыг бууруулах боломжтой юм байна гэдэг дүгнэлтийг урьдчилсан байдлаар гаргаад байна. Тиймдээ ч боломж олговол агаарын бохирдолтой богино хугацаанд тэмцэж, гайхамшгийг харуулж чадна гэдгээ миний бие ам бардам мэдэгдсэн. Энэ мэдэгдлийн дараа УИХ-д суудалтай намууд зөвшилцөж, агаарын бохирдолтой тэмцэхэд хамтарч ажиллах саналыг тавьснаар өчигдөр Засгийн газраас манайд хандсан буюу хамтарч ажиллах албан бичгийг хүргүүлээд байна. "Үндэсний эвсэл"-ийг бүрдүүлж байгаа намын удирдлагууд болон УИХ-ын гишүүдтэйгээ энэ саналыг зөвшилцөж, ирэх бямба гарагт /2025.01.18/ өгаарын бохирдлыг бууруулах үндэсний хороотой хамтарч ажиллах ажил эхэлж байна. Үүний цаана юу байна вэ гэхээр нэгдүгээрт, улс үндэстний гамшиг болсон томоохон асуудлууд дээр улс төрийн намууд хил хязгаар тогтоож, улс төржихгүйгээр хамтарч ажиллая гэдэг зарчим тогтоож байгаа. Хоёрдугаарт, нийслэл болон 21 аймагт үүсээд байгаа агаарын бохирдлын асуудалд хандаж байгаа хандлага, бодлого шийдвэр бол үнэхээр XX зууны сэтгэхүйд байгаа гэж би шүүмжлэлтэй хандаж байна. Тэгэхээр илүү эдийн засгийн чиг баримжаатай, нийгэм, эдийн засгийн хууль эрх зүйн шинэчлэлтийн асуудал хөндөгдөнө. Тиймээс УИХ-ын дарга болон даргын зөвлөлтэй ярилцсаны үндсэн дээр Үндсэн хуулийг удирдлага болгож УИХ-аас ажлын хэсэг гарч Засгийн газартай хамтарч ажиллах нь зүйтэй юм гэдэг эрх зүйн шийдвэрийг өчигдөр гаргасан. Холбогдох бэлтгэл ажлууд явагдаж байна. Хоёрдугаар сарын 7-нд утаатай холбоотой УИХ-ын сонсгол болно. Энэ сонсголыг дүгнэж, үүнтэй уялдуулж ажлын хэсэг гарч ажиллана" гэлээ.
Эх сурвалж:www.polit.mn