Т.САЙХАН

ХӨСҮТ-өөс томуу, томуу төст өвчлөлийн талаар мэдээлэл хийлээ. ХӨСҮТ-ийн Вирус судлалын лабораторийн эрхлэгч Ц.Наранзул "Нийслэлд сүүлийн долоо хоногт томуу, томуу төст  өвчин дэгдэлтийн түвшинд байна. ХӨСҮТ-ийн Вирус судлалын лаборатори сүүлийн долоо хоногт Булган, Өвөрхангай, Сүхбаатар, Увс аймгууд болон нийслэлд томуугийн сорьцод хандалт судалгаа хийсэн. Ингэхэд нийт сорьцын 62 хувьд томуу, төст өвчний вирус илэрсэн. Үүнээс таван төрлийн эмгэг төрүүлэгчийн дийлэнх нь амьсгалын замын синтициаль вирус, томуугийн H1N1 вирус эзэлж байна. Орчилд САРС, коронавирус хамгийн бага буюу нэг хувьтай байна" гэв.

ЭХЭМҮТ-ийн Хүүхдийн эрчимт эмчилгээний тасгийн их эмч Н.Энхтайван "Энэ онд томуугийн А хүрээний H1N1 давамгайлж байна. Мөн амьсгалын замын синтициаль вирустэй нийлээд нийт өвчлөлийн 70-80 хувийг эзэлж байгаа.  Эдгээр хэв шинжийн вирус нь уушгийг хүчтэй гэмтээж, амьсгал хямраадаг. Амьсгал хямрахаар бусад эрхтнүүдэд нөлөөлдөг. Түүнчлэн амьсгалын дутагдалд орсон хүүхдүүдийн хатгаа нь хүндрээгүй байсан ч гэсэн ухаан алдана, татна, тайван бус унтаж чадахгүй болдог. Хүчилтөрөгч дутсан учраас нүүрсхүчлийн хий ихэснэ. Нүүрсхүчлийн хий ихсэхээр тархины судсыг тэлдэг.  Тэлсэн судасны хана нимгэрч, нэвчимхий болдог. Улмаар цусан доторх шингэн эсүүд шүүрдэг. Ингэхдээ тархины эд рүү шүүрч, тархи хавагнадаг. Тархи хавагнахаар гавлын даралт ихсэж таталт өгдөг. Ханиадтай хүүхэд тархины дутагдлаар нэмж хүндэрдэг. Бие сультай, хэт тарган байх, зүрхний гажигтай, тархины саажилттай, дархлаа сул хүүхдүүд хамгийн түрүүнд өвддөг. Эрчимт эмчилгээний тасагт ихэнх нь ийм шалтгаанаар хүүхдүүд эмчлүүлж байна. Иймээс ханиад, томууг энгийн гэж огт бодож болохгүй. Манай улсын уур амьсгалын онцлогоос шалтгаалаад ханиад, томуу халдварын байдал илүү хүнд байдалд явагдаад байгаа юм. Иймд бид ковидын үед яаж тэмцсэн, ямар дэглэм барьсан, тэдгээрийг хатуу чанд баримтлах хэрэгтэй. Амны хаалт зүүж, гараа байнга угааж, хүн хоорондын зайг баримталбал томуугийн дэгдэлт буурна" гэлээ.

Эх сурвалж:www.polit.mn