Б.ЖАВХЛАН

Манай улс 2012 онд хамгийн анхны бондыг Монгол Улсын Хөгжлийн банк “Евро бонд”-ыг гаргаж байв. Түүнээс хойш Засгийн газраас олон улсын хөрөнгийн зах зээлд “Чингис-18”, “Чингис-22”, “Димсан”, “Мазаалай” болон “Хуралдай”, “Гэрэгэ”, “Номад”, ““Сentury-1”, “Сentury-2” гэсэн нийт 9 бонд гаргажээ.

Банкуудаас “TDB-300”, “TDB-25”, “TDB-700”, “TDB-150”, “TDB-500” гэсэн таван бонд, Монгол Улсын Хөгжлийн банк “Хөгжлийн банк-580”, “Самурай”, “Хөгжлийн банк-500” гэсэн  гурван бонд, бусад ААН, байгууллагаас “Энержи ресурс-22”, “Энержи ресурс-24”, “МИК-22”, “МИК-24” гэсэн дөрвөн бондыг тус тус гаргажээ.

Засгийн газраас гаргасан бондуудаас дөрөв нь бүрэн төлөгдөж, зургаа нь төлөгдөөгүй буюу заримынх нь хугацаа болоогүй байгаа талаар Монголбанкнаас мэдээллээ.

Манай улс 2023 онд төлөх томоохон өр төлбөрийн асуудлаа энэ оны эхэнд шийдсэн. Тодруулбал, “Сentury-2” төслийн хүрээнд Засгийн газар, Монголбанк хамтран хөрөнгө оруулагчдаас 650 сая ам.долларын бондыг амжилттай татан төвлөрүүлсэн. Ингэснээр энэ онд төлөх “Гэрэгэ”, ирэх онд төлөх “Хуралдай” бондын төлбөрийг дахин санхүүжүүлэх боломжтой болсон юм. 

Түүнчлэн Засгийн газрын олон улсын санхүүгийн зах зээл дээр 2016 онд гарган арилжсан 500 сая ам.долларын, таван жилийн хугацаатай, 10.875 хувийн хүүтэй “Мазаалай” бондын үлдэгдэл төлбөр болох 132.6 сая ам.долларын төлбөрийг 2021 оны дөрөвдүгээр сарын 6-нд, мөн 2016 онд “Кредит свисс” банкнаас авсан 250 сая ам.долларын арилжааны нөхцөлтэй зээлийн үлдэгдэл төлбөр болох 60 сая ам.долларыг 2021 оны гуравдугаар сарын 15-нд тус тус хөрөнгө оруулагчдад бүрэн төлж барагдуулж, хөрөнгө оруулагчдын өмнө хүлээсэн үүргээ биелүүлж байв.

Эх сурвалж: www.polit.mn